ەلباسى قورداي وقيعاسىنا بايلانىستى قاۋىپسىزدىك كەڭەسىنىڭ وتىرىسىن وتكىزدى
جيىن بارىسىندا جامبىل وبلىسى قورداي اۋدانىنداعى جاعداي، بيولوگيالىق قاۋىپسىزدىكتى قامتاماسىز ەتۋ جانە كوروناۆيرۋستىق ينفەكسيانىڭ تارالۋىنا قارسى تۇرۋ ماسەلەلەرى قارالدى.
ءوز سوزىندە نۇرسۇلتان نازاربايەۆ قورداي اۋدانىندا بولعان وقيعا سالدارىنان قازا تاپقانداردىڭ وتباسىنا كوڭىل ايتتى جانە بارلىق زارداپ شەككەندەردىڭ تەزىرەك ساۋىعىپ كەتۋىن تىلەدى.
«بۇل وقيعا مەنى قاتتى الاڭداتادى. وتىز جىل بويى حالقىمىزبەن بىرگە ەداۋىر قيىندىقتاردى وتكەرىپ ەدىك. جاستار بۇل قيىندىقتاردى ءتىپتى ەلەستەتە دە المايدى. ول كەزدە قازاقستاندا 130 كاسىپورىن جۇمىسىن توقتاتتى، 2,5 ميلليون ادام جۇمىسسىز جانە تابىسسىز قالدى، ۇيلەرىندە جىلۋ بولمادى، ازىق- تۇلىك تاپشى بولدى. وسىنىڭ ءبارىن بىرگە وتكەردىك»، - دەدى ەلباسى.
سونىمەن بىرگە، تۇڭعىش پرەزيدەنت قازاقستان تاۋەلسىزدىك العاننان كەيىن دە الەۋمەتتىك- ەكونوميكالىق سالادا ۇلكەن قيىندىقتار بولعانىن ەسكە سالدى.
«ەگەر ءبىز كوپ ۇلتتى حالقىمىزدى بىرىكتىرىپ، تۇراقتىلىقتى قامتاماسىز ەتە الماساق، بۇگىندە ەلىمىزگە شەتەلدىك ينۆەستيتسيالار كەلمەس ەدى، ەكونوميكا تۇرالاپ قالار ەدى. ارينە، مەملەكەتتىك جەتەكشىلەرگە ءتيىستى تاپسىرمالار بەرىلدى، ءبىراق بەيبىتشىلىك پەن كەلىسىمدى ساقتاۋ - ەڭ الدىمەن حالقىمىزدىڭ جاۋاپكەرشىلىگى»، - دەدى ن. نازاربايەۆ.
سونىمەن بىرگە، ەلباسى وقيعانىڭ سەبەپتەرىن مۇقيات زەرتتەپ، كىنالىلەردى زاڭ نورمالارىنا سايكەس جازالاۋدى تاپسىردى.
«بۇل ماسەلە اعا بۋىن وكىلدەرىن ويلاندىرۋى ءتيىس. مەنىڭ ۇلت كوشباسشىسى رەتىندەگى ماقساتىم - قازاقستاندى بولاشاق ۇرپاق ماقتان ەتەتىندەي دەڭگەيگە كوتەرۋ. اعا بۋىننىڭ مىندەتى - ادامدارعا تاۋەلسىز، دامىعان جانە تۇراقتى مەملەكەت قۇرۋدىڭ ءبىزدىڭ ورتاق ماقساتىمىز ەكەنىن ءتۇسىندىرۋ»، - دەدى قاۋىپسىزدىك كەڭەسىنىڭ ءتوراعاسى.
ەلباسى پرەزيدەنت قاسىم- جومارت توقايەۆتىڭ تاپسىرماسىمەن ۇكىمەت پەن وبلىس اكىمدىگىنىڭ زارداپ شەككەن ەلدى مەكەندەردە قالپىنا كەلتىرۋ شارالارىن جۇرگىزىپ جاتقانىن اتاپ ءوتتى.
سونداي- اق، جەرگىلىكتى اتقارۋشى جانە قۇقىق قورعاۋ ورگاندارىنىڭ، قازاقستان حالقى اسسامبلەياسى مەن ونىڭ وڭىرلىك فيليالدارىنىڭ جۇمىس ساپاسىنا ەرەكشە ءمان بەرىلدى.
«اسسامبلەيا مەن ونىڭ وڭىرلىك وكىلدىكتەرى بەلسەندى جۇمىس ىستەپ، مۇنداي جاعدايلاردى باقىلاۋدا ۇستاۋى كەرەك. بۇل - ءبىزدىڭ ورتاق مىندەتىمىز»، - دەدى تۇڭعىش پرەزيدەنت.
وتىرىس بارىسىندا جامبىل وبلىسىنىڭ اكىمى بەردىبەك ساپاربايەۆ پەن ىشكى ىستەر ءمينيسترى ەرلان تۇرعىمبايەۆتىڭ تولىققاندى بايانداماسى تىڭدالدى.
قورداي وقيعاسىن تالقىلاۋ اياسىندا ورتالىق مەملەكەتتىك جانە جەرگىلىكتى اتقارۋشى ورگاندارعا ەلىمىزدىڭ وڭىرلەرىندەگى، ونىڭ ىشىندە جۇمىسپەن قامتۋ جانە ينفراقۇرىلىمدى دامىتۋ، الەۋمەتتىك نىسانداردى قايتا قۇرۋ سالاسىنداعى الەۋمەتتىك- ەكونوميكالىق پروبلەمالاردى شەشۋگە باعىتتالعان باعدارلامالاردى ودان ءارى ىسكە اسىرۋ تاپسىرىلدى.
