بەردىبەك ساپاربايەۆ قوردايداعى وقيعا جونىندەگى ۇكىمەتتىك كوميسسيانى باسقارا بەرەدى

نۇر-سۇلتان. قازاقپارات - جامبىل وبلىسىنىڭ اكىمى بەردىبەك ساپاربايەۆ قوردايداعى وقيعا سالدارىن قويۋ جونىندەگى ۇكىمەتتىك كوميسسيانى باسقارا بەرەدى.

بۇل تۋرالى ۇكىمەت وتىرىسىندا پرەمەر-مينيستر اسقار مامين ايتتى، دەپ حابارلايدى قازاقپارات ءتىلشىسى.

«وكىنىشكە قاراي، وسى قايعىلى وقيعا كەزىندە 10 دام قازا تاۋىپ، 178 ادام زارداپ شەكتى. سونىمەن قاتار تۇرعىن ۇيلەر مەن كوممەرتسيالىق نىساندارعا، ازاماتتاردىڭ دۇنيە-مۇلكىنە زاقىم كەلتىرىلدى. وسى كۇندەرى بەردىبەك ساپاربايەۆتىڭ توراعالىعىمەن قورداي اۋدانىندا وقيعا سالدارىن جويۋ جونىندەگى ۇكىمەتتىك كوميسسيا جۇمىس ىستەدى. وزدەرىڭىزگە ءمالىم، مەملەكەت باسشىسىنىڭ جارلىعىمەن بەردىبەك ماشبەك ۇلى ساپاربايەۆ جامبىل وبلىسىنىڭ اكىمى بولىپ تاعايىندالدى. بەردىبەك ماشبەك ۇلى ۇكىمەتتىك كوميسسيانى ودان ارى باسقاراتىن بولادى»، - دەپ اتاپ ءوتتى ۇكىمەت وتىرىسىن اشقان پرەمەر-مينيستر.

وسىدان كەيىن جامبىل وبلىسىنىڭ اكىمى وسى كۇندەرى اتقارىلعان جۇمىستار جايىندا ەسەپ بەردى.

«قازىرگى تاڭدا جالپى جامبىل وبلىسىنىڭ قورداي اۋداندا جاعداي تۇراقتى. بارلىق قۇقىق قورعاۋ ورگاندارىنىڭ كومەگىمەن جەرگىلىكتى اكىمدىكتەر جۇمىس ىستەپ جاتىر. جالپى وتكەن 5 كۇننىڭ ىشىندە دارىگەرلىك كومەككە 141 ادام جۇگىندى. ونىڭ ىشىندە 19 ى پوليتسيا قىزمەتكەرلەرى. وكىنىشكە وراي 10 ادام قايتىس بولدى. قايتىس بولعان وتباسىلارعا جەرگىلىكتى دەمەۋشىلەردىڭ، اكىمدىكتەردىڭ تاراپىنان كومەك كورسەتىلدى. كوميسسيا مۇشەلەرى بارلىق قايتىس بولعان ازاماتتىڭ وتباسىلارىنا مەملەكەت باسشىسى قاسىم-جومارت توقايەۆتىڭ اتىنان كوڭىل ايتتى. بارلىق شارالارىنا قاتىستىق. قازىرگى تاڭدا قورداي اۋداندىق اۋرۋحاناسىندا 13، الماتى قالاسىندا 25 ادام دارىگەرلىك كومەك الىپ جاتىر. قىرعىزستاندا بولعان 9 ادامدى الماتى مەن تارازعا قايتاردىق»، - دەدى بەردىبەك ساپاربايەۆ.

ونىڭ اتاپ وتۋىنشە، قوردايعا الماتىدان 10 بەلگىلى، مىقتى دارىگەرلەر شاقىرىلعان.