داۋرەن ابايەۆ: ۇلتارالىق ارازدىقتى قوزدىراتىن حاباردى تاراتقان بىرنەشە ادام انىقتالدى
«جۋرناليستەردى قورداي اۋدانىندا بولعان قايعىلى جاعداي جونىندە اقپارات بەرگەندە وبەكتيۆتى بولۋعا شاقىرامىن. ازاماتتاردى الاڭداتاتىن، ەلدى شۋلاتاتىن مالىمەت بەرمەۋدى سۇرايمىن. بايقاساڭىزدار، مىنا جانجال ەڭ باسىندا تەك ءبىر اۋىل دەڭگەيىندە بولعان. الايدا ۋاتساپ، تەلەگرام سەكىلدى مەسسەندجەرلەر ماسەلەنى قوزدىرعان، جاعدايدى ۋشىقتىرعان. ناتيجەسىن كورىپ وتىرسىزدار. بىرنەشە ادام قازا تاۋىپ، جاراقات الدى»، - دەدى داۋرەن ابايەۆ و ك ق- دا وتكەن باسپا ءسوز ءماسليحاتىندا.
مينيستر ءاربىر تاراتقان اقپاراتقا جاۋاپ بارىن ۇمىتپاۋ كەرەكتىگىن ايتىپ ءوتتى. «بۇل دا ايتىلعان ءسوز سياقتى - قايتارا المايسىز. سوندىقتان اۋديو- ۆيدەونى تاراتقان كەزدە اباي بولىڭىزدار. ءسىز تاراتقان اقپاراتتان كىناسىز بىرەۋدىڭ زارداپ شەكپەۋىن ويلاۋ قاجەت. وسى تۇستا تەك جۋرناليستەرگە عانا ەمەس، ەلىمىزدىڭ ءاربىر ازاماتىنا ەسكەرتكىم كەلەدى. ءبىز «ادامزاتتىڭ ءبارىن ءسۇي، باۋىرىم دەپ» دەگەن ابايدىڭ ەلىمىز عوي، اعايىن. اسىعىس شەشىم قابىلدامايىق. سابىر ساقتايىق. بۇل جانجالدى باستاعاندار ەشقايدا قاشىپ قۇتىلا المايدى. قازىر ينتەرنەتكە، بارلىق الەۋمەتتىك جەلىگە، مەسسەندجەرگە مونيتورينگ جاسالۋدا. ول جەردە ۆيدەو- اۋديوحابارلار - بارلىعى قاداعالانادى»، - دەدى ول.
داۋرەن ابايەۆ قازىردىڭ وزىندە بىرنەشە قولدانۋشىلار انىقتالىپ وتىرعانىن، ولار ۇلتارالىق ارازدىقتى قوزدىراتىن حاباردى تاراتقانىن جەتكىزدى. «دەزينفورماتسيا تۋدىرعان. ول مالىمەتتەر قۇقىققورعاۋ ورگاندارىنا بەرىلەدى. بۇل جانجاندى باستاعاندار دا، وعان قوسا بارلىق پروۆوكاتورلار دا جاۋاپقا تارتىلادى. كوميسسيا قازىر قورداي اۋدانىنا بارا جاتىر. بارلىق جاعدايدى كوميسسيا حابارلايدى. ءبىز قازىر ق ح ا وكىلدەرىن، جەرگىلىكتى اقساقالداردى، قوعام قايراتكەرلەرىن، يمامداردى تارتا وتىرىپ، حالىقتى سابىرعا شاقىرامىز. قازىر ەلدى دۇرلىكتىرەتىندەي نەگىز جوق. جاعداي باقىلاۋدا»، - دەدى ول.
ەسكە سالا كەتسەك، بۇعان دەيىن ىشكى ىستەر ءمينيسترى ەرلان تۇرعىمبايەۆ قوردايداعى وقيعا سالدارىنان 8 ادامنىڭ كوز جۇمعانىن ءمالىم ەتكەن ەدى.
