ابايەۆ شەتەلدەن اكەلىنگەن كولىكتەرگە قاتىستى: ەشكىمگە جەڭىلدىك بەرىلمەيدى

نۇر-سۇلتان. قازاقپارات – ق ر اقپارات جانە قوعامدىق دامۋ ءمينيسترى داۋرەن ابايەۆ ە ا ە و ەلدەرىنەن جەتكىزىلگەن كولىكتەردى تەگىن تىركەۋ ۇسىنىسىنا پىكىر ءبىلدىردى، دەپ حابارلايدى قازاقپارات ءتىلشىسى.

«قازاقستاننىڭ بارلىق ازاماتتارى كولىك تىركەۋى ءۇشىن اقشا تولەيدى. مۇندا ەشكىمگە جەڭىلدىك بەرىلمەيدى. ىشكى ىستەر مينيسترلىگى زەرتتەۋ جۇرگىزىپ، ءبىر ادامنىڭ بىرنەشە كولىك اكەلگەنىن انىقتادى. مىسالى، الماتى وبلىسىنىڭ تۇرعىنى 70 كولىك اكەلگەن، اتىراۋ وبلىسىنىڭ ەكى تۇرعىنى 80 كولىك جەتكىزگەن. مۇنى جەكەلەگەن جاعدايلار دەپ ايتۋىڭىز مۇمكىن. ءبىراق، جالپى ستاتيستيكادا 500 قازاقستاندىق 5 جانە ودان كوپ كولىك تاسىعان»، - دەدى مينيستر «حابار» ارناسىنداعى «اشىق ديالوگ» باعدارلاماسىندا.

ونىڭ ايتۋىنشا، بۇل ادامدار كولىكتى سوڭعى اقشاسىنا العان جوق، و باستا زاڭنان ىلىك ىزدەپ، پايدا تابۋ ماقساتىن كوزدەگەن.

«مۇنداي كولىكتەردىڭ يەلەرى جۇيەلى تۇردە جول ەرەجەسىن بۇزىپ كەلگەن. شامامەن 1 ميلليارد تەڭگەگە قۇقىقبۇزۋشىلىق تىركەلگەن جانە ونىڭ %90 ءالى تولەنگەن جوق. BMW ماركالى اۆتوكولىك يەسى 450 رەت ەرەجە بۇزعان. قۇددى ءبىر ادەيى جاسايتىنداي. بۇل رەتتە ماڭىزدى شارالار قابىلداۋ قاجەت. ارينە، ۇيدە وتىرىپ سىن ايتۋ، مەملەكەتتى كىنالاۋ وڭاي. ءبىراق، سول جىگىت قانشاما كىناسىز ادامداردىڭ ءومىرىن قيۋى مۇمكىن ەدى»، - دەدى د. ابايەۆ.

ەسكە سالايىق، مەملەكەت باسشىسى قاسىم-جومارت توقايەۆ 24- قاڭتار كۇنى وتكەن ۇكىمەتتىڭ كەڭەيتىلگەن وتىرىسىندا قازاقستاننىڭ زاڭناماسىنا ساي كەلمەيتىن شەتەلدىك كولىكتەردى ەلگە كىرگىزبەۋدى تاپسىردى.

سونداي-اق ۇكىمەتكە ءبىر ايدىڭ ىشىندە قازاقستان ازاماتتارىنىڭ ە ا ە و ەلدەرىنەن اكەلگەن كولىكتەرىن ۋاقىتشا تىركەتۋدى تاپسىردى.

«بۇل كولىكتەردىڭ تىركەلۋى 2021-جىلدىڭ 1- ناۋرىزىنا دەيىن كۇشىندە بولادى. مۇنداي كولىكتەر تەحنيكالىق رەگلامەنتتىڭ تالاپتارىنا ساي بولۋى كەرەك. سونداي-اق، تىركەۋ سوماسى مەن مەملەكەتتىك باجدى تولەۋى ءتيىس. ۋاقىتشا تىركەۋ ءبىر قولدان ەكىنشى قولعا ساتىلىپ بارىپ، جاسالماۋى ءتيىس. 2021-جىلدىڭ 1- ناۋرىزىنا دەيىن اۆتوكولىك يەلەرى كولىكتەرىن تۇراقتى تارتىپتە تىركەپ، كەدەندىك باج بەن ۋتيليزاتسيالىق سومانى تولەۋى ءتيىس. بولماسا ول كولىكتى ەلدەن شىعارۋى نەمەسە زاڭنامامەن تىيىم سالىنبايتىن باسقا دا امالمەن ماسەلەسىن رەتتەۋى قاجەت. ۇكىمەتكە قازاقستاننىڭ زاڭناماسىنا قايشى كەلەتىن كولىكتەردى بۇدان ارى كىرگىزبەۋدى جانە پايدالانۋعا شەكتەۋ قويۋ شارالارىن قولعا الۋدى تاپسىرامىن»، - دەدى مەملەكەت باسشىسى.