مينيستر ابايەۆ قازاقستاندىقتار قىتايدان قالاي ەۆاكۋاتسيالانعانىن ايتىپ بەردى
بۇل تۋرالى ق ر اقپارات جانە قوعامدىق دامۋ ءمينيسترى داۋرەن ابايەۆ ايتتى، دەپ حابارلايدى قازاقپارات ءتىلشىسى.
«ازاماتتارىمىزدى ەۆاكۋاتسيالاۋ ماسەلەسى مەملەكەت باسشىسىنىڭ تىكەلەي باقىلاۋىندا بولدى. باستاپقىدا-اق ءوز ازاماتتارىمىزدى قيىندىقتا قالدىرمايمىز دەگەن ۇستانىم بولدى. ارينە، حالىق ولاردى تەز ارادا ەۆاكۋاتسيالاۋدى تالاپ ەتتى. ءبىراق، مۇنداي ماسەلەدە اسىعىستىققا جول بەرىلمەيدى. ۇكىمەت، ونىڭ ىشىندە دەنساۋلىق ساقتاۋ، سىرتقى ىستەر مينيسترلىكتەرى، ازاماتتىق اۆياتسيا كوميتەتى ۇيىمداستىرۋ جۇمىستارىمەن قاتار اينالىستى. ساناۆياتسيا بورتىنان باستاپ، ارنايى كورپۋسقا دەيىن ازىرلەدى. قىتايلىق تاراپپەن ماڭىزدى ديپلوماتيالىق كەلىسسوزدەر جۇرگىزىلدى. بۇل رەتتە، قىتايلىق تاراپقا تۇسىنىستىك تانىتقانى ءۇشىن العىس ايتۋىمىز كەرەك»، - دەدى مينيستر «حابار» ارناسىنداعى «اشىق ديالوگ» باعدارلاماسىندا.
سونىمەن بىرگە، مينيستر شەتەلدىك ازاماتتاردى قۇتقارۋعا نارازى بولعاندارعا جاۋاپ بەردى.
«دۇنيەجۇزىلىك دەنساۋلىق ساقتاۋ ۇيىمىنىڭ بارلىق تالاپتارى ەسكەرىلىپ، ەۆاكۋاتسيالانعان قازاقستاندىقتار بولەك اۋرۋحاناعا جاتقىزىلدى. وعان قوسا، بەلارۋس، قىرعىزستان، ارمەنيا ازاماتتارى دا بار. الەۋمەتتىك جەلىدە «شەتەلدىكتەردى نەگە قۇتقاردىڭدار؟» دەگەن پىكىرلەر قايران قالدىردى. ال كەشە، سىرتقى ىستەر مينيسترلىگى رەسەي مەن وزبەكستاننىڭ ارنايى ۇشاقتارى ارقىلى 8 قازاقستاندىقتىڭ ەۆاكۋاتسيالانعانىن حابارلادى. ءبىزدىڭ ۇكىمەتتەر ورتاق قيىندىقتا بىرلەسىپ جۇمىس ىستەپ جاتىر. مەنىڭشە، ءدال وسى ۇستانىم ماسەلەنى تەزىرەك رەتتەۋگە ىقپال ەتەدى»، - دەدى داۋرەن ابايەۆ.
ايتا كەتەيىك، 2020-جىلدىڭ 2- اقپانىندا ق ر د س م- ءنىڭ ۇلتتىق شۇعىل مەديتسينا ۇيلەستىرۋ ورتالىعى قىتايدىڭ ۋحان قالاسىنان 83 قازاقستاندىقتى، ونىڭ ىشىندە 80 ستۋدەنتتى ەلگە جەتكىزدى.
ال 5- اقپاندا قازاقستاننىڭ 8 ازاماتى ۋحان قالاسىنان رەسەي مەن وزبەكستانعا ەۆاكۋاتسيالاندى.
بۇگىندە كوروناۆيرۋستىڭ جاڭا ءتۇرى ورشىگەن قىتاي ەلىندە ىندەتكە شالدىققاندار سانى 25 مىڭعا جۋىقتادى، 500-گە جۋىق ادام كوز جۇمدى.
قازاقستان سىرتقى ىستەر مينيسترلىگىنىڭ اقپاراتىنا سايكەس، قازىرگى تاڭدا ق ح ر اۋماعىندا ەلىمىزدىڭ 780 ازاماتى ءجۇر. ونىڭ 559 ى - ستۋدەنتتەر.
