قاسىم- جومارت توقايەۆ تۇركيا پرەزيدەنتىنە كوڭىل ايتتى

نۇر- سۇلتان. قازاقپارات - مەملەكەت باسشىسى قاسىم- جومارت توقايەۆ تۇركيا پرەزيدەنتى رەجەپ تاييپ ەردوعانعا كوڭىل ايتۋ جەدەلحاتىن جولدادى، دەپ حابارلايدى قازاقپارات اقورداعا سىلتەمە جاساپ.

قازاقستان پرەزيدەنتى ۆان پروۆينتسياسىنداعى قار كوشكىنى سالدارىنان كوپتەگەن ادامنىڭ قازا بولعانى جانە زارداپ شەككەنى تۋرالى سۋىت حاباردى تەرەڭ كۇيزەلىسپەن قابىل الدى.

«وسىنداي اۋىر ساتتە قايعى- قاسىرەتتەرىڭىزگە ورتاقتاسىپ، بارشا قازاقستاندىقتار مەن جەكە ءوز اتىمنان سىزگە،

سونداي- اق باۋىرلاس تۇرىك حالقىنا قايعىرا كوڭىل ايتامىن. اللا تاعالادان تابيعي اپات كەزىندە قازا تاپقانداردىڭ جاندارى ءجانناتتا بولۋىن، جارالانعانداردىڭ تەز ارادا ساۋىعىپ كەتۋىن تىلەيمىن»، - دەلىنگەن جەدەلحاتتا.

ەسكە سالايىق، 4 - اقپان كۇنى تۇركيا شىعىسىنداعى ۆان پروۆينتسياسىندا قار كوشكىنى بولدى. جولدا قار تازالايتىن كولىك جۇمىس ىستەگەن، ونىڭ ارتىنان جولاۋشىلار مىنگەن اۆتوبۋس كەلە جاتقان. كەنەتتەن تاۋدان كوشكىن ءجۇرىپ، قار تازالايتىن تەحنيكانى كومىپ قالعان جانە شاعىن اۆتوبۋستى 40 مەترلىك جاردان قۇلاتىپ جىبەرگەن.

سوڭعى مالىمەتتەر بويىنشا، وقيعا سالدارىنان 33 ادام قازا بولدى. ولاردىڭ اراسىندا ادامداردى قۇتقارماق بولعان قاۋىپسىزدىك كۇشتەرىنىڭ قىزمەتكەرلەرى بار. 50-دەن استام ادام زارداپ شەكتى.

ب ا ق- تار اقپاراتىنا سايكەس، ءبىر تاۋلىكتە ەكى قار كوشكىنى تۇسكەن.