مەملەكەتتىك حاتشى تويلار مەن استاردى ىسىراپسىز وتكىزۋ تۋرالى ۇسىنىمدار دايىنداۋدى تاپسىردى
«ماجىلىستە ۇسىنىلعان ءىس- شارالار جوسپارىنىڭ جوباسىمەن تانىسقان كەزدە پراگماتيزم باعىتى بويىنشا ءبىرشاما شارا ەنگىزىلگەنىن بايقادىڭىزدار. سوندىقتان، جوسپاردى جۇزەگە اسىرۋ بارىسىندا قوعامنىڭ بارلىق كۇش- جىگەرىن بۇل ىسكە جۇمىلدىرۋ كەرەك. ول ءۇشىن اقپارات جانە قوعامدىق دامۋ مينيسترلىگى مادەنيەت جانە سپورت مينيسترلىگىمەن، ءبىلىم جانە عىلىم مينيسترلىگىمەن، زيالى قاۋىم، قوعامنىڭ بەلسەندى وكىلدەرىن تارتا وتىرىپ، وسى ادەت- عۇرىپتىق راسىمدەردى، اسىرەسە تويلار مەن استاردى ىسىراپسىز ءارى داڭعازاسىز وتكىزۋگە بايلانىستى ۇسىنىمداردى دايىنداۋعا تاپسىرۋدى دۇرىس دەپ ەسەپتەيمىن»، - دەدى مەملەكەتتىك حاتشى اقوردادا وتكەن ۇلتتىق كوميسسيا جيىنىندا.
ونىڭ ايتۋىنا قاراعاندا، «رۋحاني جاڭعىرۋ» باعدارلاماسى شەڭبەرىندە ۇكىمەتتەن باستاپ، جەرگىلىكتى اتقارۋشى ورگاندارعا بەرىلەتىن تاپسىرمالار بار.
«ءبىز الداعى جۇمىس جوسپارىمىزدى وتە جيناقى ماقساتتى ءارى نىسانالى تۇردە جۇرگىزۋىمىز كەرەك. ول ءۇشىن جۇمىس جوسپارىن ءۇش باعىتقا جىكتەپ وتىرمىز. ءبىرىنشى باعىت - تۇلعالىق دامۋ باعىتى. بۇل باعىتتىڭ ىشىنە ءبىلىمنىڭ سالتانات قۇرۋى، پراگماتيكالىق قۇندىلىقتاردى ءسىڭىرۋ، باسەكەگە قابىلەتتىلىك سىندى قۇندىلىقتاردى جيناقتاپ، ادامي كاپيتالدى ارتتىرۋعا باعىتتايمىز. اسىرەسە، جاستار ماسەلەسىنە ەرەكشە كوڭىل ءبولىنۋى كەرەك. ەكىنشى باعىت - ۇلتتىق بىرەگەيلىكتى ساقتاۋ. بۇل باعىت ۇلتتىق قۇندىلىقتاردى ساقتاۋ، ۇلتتىق بىرەگەيلىكتى حالىقارالىق دەڭگەيدە كورسەتۋ سىندى كەشەندى شارالاردى قامتيدى. ءۇشىنشى باعىت - مەملەكەت پەن قوعامنىڭ دامۋى. بۇل باعىت ەلىمىزدە ريەۆوليۋتسيالىق دامۋ ەمەس، ەۆوليۋتسيالىق دامۋ، سانانىڭ اشىقتىعى، «حالىق ۇنىنە قۇلاق اساتىن مەملەكەت» تۇجىرىمداماسى اياسىندا جۇزەگە اسادى. باعدارلامانى جۇزەگە اسىرۋدا ناۋقانشىلىققا جول بەرمەۋىمىز كەرەك»، - دەدى مەملەكەتتىك حاتشى.
قىرىمبەك كوشەربايەۆ اتالعان مىندەتتەردى ساپالى تۇردە ورىنداۋ ءۇشىن كوميسسيا اتىنان ناقتى ءبىرقاتار تاپسىرما بەرىلەتىنىن جەتكىزدى.
«بىرىنشىدەن، مەملەكەتتىك كوميسسيانىڭ حاتتاماسىمەن «رۋحاني جاڭعىرۋ» باعدارلاماسىن ىسكە اسىرۋ جونىندەگى 2020 -جىلعا ارنالعان ءىس- شارالار جوسپارى بەكىتىلسىن. ەكىنشىدەن، قازاقستان رەسپۋبليكاسىنىڭ ۇكىمەتى «رۋحاني جاڭعىرۋ» باعدارلاماسىن ىسكە اسىرۋ جونىندەگى 2020 -جىلعا ارنالعان ءىس- شارالار جوسپارىندا كوزدەلگەن شارالاردىڭ قارجىلاندىرىلۋىن جانە ساپالى ىسكە اسىرىلۋىن قامتاماسىز ەتۋى كەرەك. ۇشىنشىدەن، ب ع م ءبىلىم بەرۋدى دامىتۋدىڭ مەملەكەتتىك باعدارلاماسىنا پاتريوتتىق بىلىمدىلىك، باسەكەگە قابىلەتتىلىك، فۋنكتسيونالدىق، ۇلتتىق كود سياقتى تاربيەلىك ەلەمەنتتەردى قامتي وتىرىپ، كۇشەيتىلگەن تاربيە كومپونەنتىن ەنگىزۋ جونىندە شۇعىل شارالار قابىلداسىن. سونىمەن قاتار، ءبىرتۇتاس قازاقستان مەملەكەتتىك يدەولوگياسىنىڭ پارمەنىن جۇرگىزۋ ماقساتىندا جالپى قازاقستاندا بالالار مەن جاستار قوزعالىسىن قۇرۋ جونىندە مەملەكەت باسشىسىنىڭ اتىنا ۇسىنىس دايىندالسىن. جاس ۇرپاقتى پاتريوتيزمگە باۋلۋ جانە ولاردىڭ باسەكەگە قابىلەتتىگىن ارتتىرۋ ماقساتىندا حالىق سانى 30 مىڭنان جوعارى اۋدان ورتالىقتارىندا اۋىل بالالارىنا ارنالعان بەيىمدىك دارىندى بالالار مەكتەپ- ينتەرناتتارىن اشۋ، سونداي- اق اسكەري كادەتتەر مەكتەپتەرىن اشۋ، وندا جەتىم جانە اتا- انانىڭ قامقورلىعىنسىز قالعان بالالاردىڭ دا وقۋىنا قاجەتتى مۇمكىندىك جاساۋ جونىندە پرەزيدەنت اكىمشىلىگىنە 1 - ناۋرىزعا دەيىن ءتيىستى ۇسىنىس ەنگىزىلسىن»، - دەدى ول.
مەملەكەتتىك حاتشى سونىمەن قاتار تانىمدىق باعدارلامالار شىعارۋعا بارلىق ب ا ق- تى جۇمىلدىرۋدى جۇكتەدى.
اۆتور ايان بەكەن ۇلى
