مەملەكەتتىك حاتشى «رۋحاني جاڭعىرۋ» باعدارلاماسى بويىنشا اتقارىلعان ءۇش جىلدىق جۇمىستى قورىتىندىلادى

نۇر-سۇلتان. قازاقپارات - اقوردادا ق ر پرەزيدەنتى جانىنداعى قوعامدىق سانانى جاڭعىرتۋ باعدارلاماسىن ىسكە اسىرۋ جونىندەگى ۇلتتىق كوميسسيانىڭ وتىرىسى ءوتتى، دەپ حابارلايدى قازاقپارات ءتىلشىسى.

قازاقستان رەسپۋبليكاسىنىڭ مەملەكەتتىك حاتشىسى قىرىمبەك كوشەربايەۆتىڭ توراعالىعىمەن وتكەن جيىندا 2019 -جىلى باعدارلامانى ىسكە اسىرۋدىڭ ناتيجەلەرى مەن الدا اتقارىلاتىن جۇمىستىڭ جاڭا باسىم باعىتتارى قارالدى.

«وزدەرىڭىزگە بەلگىلى، قازاقستان رەسپۋبليكاسىنىڭ تۇڭعىش پرەزيدەنتى - ەلباسى نۇرسۇلتان ءابىش ۇلى نازاربايەۆتىڭ باستاماسىمەن «رۋحاني جاڭعىرۋ» باعدارلاماسىن ىسكە اسىرىلىپ جاتقانىنا بيىل ءۇش جىل تولادى. ءۇش جىلعا جۋىق ۋاقىتتا ەلەۋلى جۇمىستار اتقارىلىپ، ناقتى جوبالار جۇزەگە اسىرىلدى. سونىمەن بىرگە مەملەكەت باسشىسى قاسىم-جومارت كەمەل ۇلى توقايەۆتىڭ جاقىندا جارىق كورگەن «اباي جانە ХХІ عاسىرداعى قازاقستان» ماقالاسىنداعى ويشىلدىڭ ەڭبەكتەرى ارقىلى تارالعان رۋحاني باعىتتارى وسى باعدارلامامەن تابيعي ساباقتاستىق تاۋىپ وتىرعانىن قوعامدىق پىكىر قولداپ وتىر»، - دەدى قىرىمبەك كوشەربايەۆ وتىرىس بارىسىندا.

مەملەكەتتىك حاتشى ءوز سوزىندە «رۋحاني جاڭعىرۋ» باعدارلاماسى ءوزىنىڭ ولشەمدەرى بويىنشا ناقتى جوبالاردى ىسكە اسىرۋعا باعىتتالعان كەشەندى باعدارلاما ەكەنىن اتاپ ءوتتى.

«سونىڭ ناتيجەسىندە بۇگىن دە باعدارلاما زاماناۋي قازاقستاندىق مادەنيەت، وزىق ءبىلىم، عىلىمي زەرتتەۋ، ارحەولوگيا جانە باسقا دا ءتۇرلى باعىتتاردىڭ دامۋىنا ەداۋىر سەرپىلىس بەرۋدە. قازىرگى تاڭدا 6 باعىت بويىنشا 13 ارنايى جوبا ىسكە اسىرىلۋدا. جاسىراتىنى جوق ءبىرقاتار جوبا ناتيجەلى جۇرگىزىلسە، كەيبىرى كوزدەگەن مەجەدەن شىعا الماي وتىر. «تۋعان جەر» جوباسى اياسىندا مەتسەناتتاردىڭ ارقاسىندا دەمەۋشىلىك قاراجات ەسەبىنەن 2019 -جىلى 60 ميلليارد تەڭگەگە جۋىق قاراجات تارتىلدى. ونىڭ ىشىندە 889 نىسان جاڭادان سالىندى. 631 نىسان كۇردەلى جوندەۋدەن ءوتتى. اتاپ ءوتۋ كەرەك، قارجىلاندىرۋدىڭ ەڭ كوپ كولەمى ماڭعىستاۋ، الماتى، اتىراۋ، قىزىلوردا جانە اقمولا وبلىستارىنىڭ ۇلەسىندە. بۇل كورسەتكىشتەر قازاقستانداعى بيزنەس وكىلدەردىڭ الەۋمەتتىك جاۋاپكەرشىلىگىن كورسەتەتەىن بايقاتادى»، - دەدى ول.

قىرىمبەك كوشەربايەۆ سونىمەن قاتار «اۋىل - ەل بەسىگى» جوباسى بويىنشا الداعى ءۇش جىلداعى ءىس-شارالاردى ىسكە اسىرۋعا ۇكىمەت رەسپۋبليكالىق بيۋدجەتتەن 90 ميلليارد تەڭگە قاراستىرىلعانىن ايتتى. ونىڭ ىشىندە 2019 -جىلى 30 ميلليارد تەڭگە ءبولىنىپ، 711 جوبادان تۇراتىن 53 اۋىلدىق ەلدىمەكەندە 452 ينفراقۇرىلىمدىق جوبا ىسكە اسىرىلدى.

«قالعان جوبالار ەلىمىزدىڭ رۋحانياتى مەن تاريحىن، ادەبيەتى مەن مادەنيەتىن، ءبىلىمى مەن عىلىمىن تەرەڭدەتۋ، تانىتۋ، زەرتتەۋ باعىتتارى بويىنشا جالعاسۋدا»، - دەدى مەملەكەتتىك حاتشى.

اۆتور: ايان بەكەن ۇلى