ەۋروپارلامەنتتە «جۋسان» گۋمانيتارلىق وپەراتسياسى تالقىلاندى
سەيسەنبى كۇنى ەۋروپا پارلامەنتىندە «قازاقستان تاجىريبەسى: سيرياداعى سودىرلاردىڭ وتباسىلارىن ەلگە قايتارۋ» اتتى تاقىرىپتا كونفەرەنسيا ءوتىپ، وندا ەلىمىزدىڭ ساراپشىلارى «جۋسان» گۋمانيتارلىق وپەراتسياسى تۋرالى باياندادى.
فرانسيا ەۋروپارلامەنتىنىڭ وكىلى تەرري ماريانيدىڭ قولداۋىمەن ۇيىمداستىرىلعان شاراعا ەۋروپا پارلامەنتىنىڭ وكىلدەرى، ساراپشىلار، ەۋروكوميسسيا قىزمەتكەرلەرى، ديپلوماتيالىق كورپۋس پەن ۇكىمەتتىك ەمەس ۇيىمداردىڭ جانە جۋرناليستەر قاۋىمداستىعىنىڭ وكىلدەرى قاتىستى.
سيرياداعى تەرروريزممەن كۇرەستەگى باستى ناتيجە وسى ەلگە شەت مەملەكەتتەردەن بارعان سودىرلاردىڭ ءوز ەلدەرىنە قايتارىلۋى بولىپ تابىلادى.
«ماگريب تۇرمەلەرىندە (مىسىردان باتىسقا قاراي ورنالاسقان سولتۇستىك افريكاداعى مەملەكەت) ءبىزدىڭ كوپتەگەن ازاماتتارىمىز جاتىر. ءبىز قازاقستاننىڭ رەپاترياتسيا باعىتىنداعى تاجىريبەسىن ۇيرەنسەك دەپ ەدىك»، - دەدى تەرري مارياني.
ەۋروپا پارلامەنتىنىڭ دەپۋتاتى بۇل ەلدە ءوز وتانداستارىن سيريا مەن يراكتان قايتارۋ ىسىنە دەگەن كوزقاراستارى باسقاشا ەكەنىن ايتتى.
«بۇل ماسەلەگە قاتىستى ەۋروپانىڭ ءار مەملەكەتىنىڭ ءوز كوزقاراسى بار»، - دەيدى ول.
«فرانسيا دا بۇل پروبلەماعا اسا ساقتىقپەن قارايدى. ەۋرووداقتىڭ كوپتەگەن مەملەكەتتەرى بالالاردى ەسەپتەمەگەندە ءوز ازاماتتارىن ەلگە قايتارۋ ىسىندە اسا بەلسەندى ەمەس»، - دەدى مارياني.
ءوز كەزەگىندە قازاقستاننىڭ بەلگياداعى توتەنشە جانە وكىلەتتى ەلشىسى ايگۇل قۇسپان الەمدىك قاۋىمداستىقتىڭ «جۋسان» گۋمانيتارلىق وپەراتسياسىن تەڭدەسسىز شارا رەتىندە باعالاعاندىعىن ايتتى.
«جاقىنا عانا قازاقستاندا ساپارمەن بولعان ا ق ش- تىڭ مەملەكەتتىك حاتشىسى قازاقستانىڭ بۇل باعىتتا كوشباسشى بولىپ وتىرعاندىعىن ايتىپ، وڭ باعاسىن بەردى. بۇۇ- نىڭ جەنيەۆاداعى كەڭسەسىندە دە ءبىزدىڭ تاجىريبەمىزدى جاقسى باعالادى»، - دەگەن پىكىرىمەن ءبولىستى قازاقستاندىق ديپلومات.
كونفەرەنتسيادا ءسوز سويلەگەن انتيتەرروريستىك ورتالىق جەتەكشىسىنىڭ ورىنباسارى سەرگەي شۆەيكين سيريانىڭ اسكەري قاقتىعىس بولىپ جاتقان ايماقتارىنداعى قازاقستاندىقتاردى سايكەستەندىرۋ، ەۆاكۋاتسيالاۋ جانە بەيىمدەۋ شارالارى تۋرالى ايتىپ بەردى.
ول «وپەراتسيانىڭ گۋمانيتارلىق ماقساتى ورىندالدى. وتانداستىرىمىز ەلگەن ورالعان سوڭ جاڭا ءومىر باستاۋ مۇمكىندىگىن الدى، ال ولاردىڭ ۇرپاقتارى بەيبىت ەلدە تىرشىلىك ەتۋدە»، - دەگەن مەملەكەت باسشىسى قاسىم-جومارت توقايەۆتىڭ ءسوزىن كەلتىردى.
ونىڭ سوزىنشە، ءوز وتانداستارىن ەلگە قايتارۋ بويىنشا ەلىمىزدىڭ تاجىريبەسى حالىقارالىق تەرروريزممەن كۇرەس پراكتيكاسىنا قوسىلعان ەلەۋلى ۇلەس بولىپ وتىر.
«بۇل تاجىريبە قازىر پروبلەمالىق اسپەكتىلەرىمەن بىرگە ءتيىمدى ادىستەمە دايىنداپ، تاجىريبە جيناقتاۋ ءۇشىن مۇقيات زەرتتەلۋدە. بۇل جۇمىسقا مەملەكەتتىك ورگاندارمەن قاتار ۇكىمەتتىك ەمەس ۇيىمدار دا تارتىلعان»، - دەپ قوستى ول.
«تەرروريزممەن كۇرەستە كۇش بىرىكتىرۋدىڭ ماڭىزدى ەكەنىن ەسكەرە وتىرىپ، ءبىز بۇدان ءارى دە ءتيىمدى تاجىريبەلەرمەن الماسۋعا دايىن ەكەنىمىزدى ايتقىم كەلەدى»، - دەدى شۆەيكين ەۋروپالىقتارعا قاراتا ايتقان سوزىندە.
كونفەرەنتسيا بارىسىندا «جۋسان» وپەراتسياسى اياسىندا ەلگە ورالعان سابينەللا ايازبايەۆا دا ءسوز سويلەدى. قالىڭ كوپشىلىك ونىڭ بەس بالاسىمەن بىرگەن سيريادا وتكىزگەن كۇندەرى تۋرالى اڭگىمەسىن ۇيىپ تىڭدادى.
تەرروريستەردىڭ ادىلەتسىزدىگى، قاتالدىعى مەن ادامي قاسيەتتەردەن جۇرداي ارەكەتتەرى تۋرالى اسەرلى اڭگىمەدەن سوڭ زالدا وتىرعاندار مەن سابينەللانىڭ ءوزى دە ەرىكسىزدەن كوزىنە جاس الدى.
سپيكەرلەردىڭ سوزدەرى جينالعانداردى ايتارلىقتاي قىزىقتىردى دەسە بولادى. اۋديتوريانى اسىرەسە بالالار مەن ايەلدەردى بەيىمدەۋ، سودىرلاردى راديكالسىزداندىرۋ، ولاردىڭ كىنالارىن راستايتىن دالەلدەر مەن ەلىمىزدىڭ ينتەرنەتتەگى زاڭسىز كونتەنتپەن كۇرەس باعىتىنداعى تاجىريبەسى قىزىقتىردى.
كونفەرەنتسيانىڭ سوڭىندا جيىنعا قاتىسۋشىلار قازاقستاندىق تاراپتىڭ كەشەندى وڭالتۋ جۇمىستارىن جوعارى باعالادى. قالىڭ كوپشىلىك اسكەري قاقتىعىستار ايماعىنان ادامداردى ەۆاكۋاتسيالاۋ بويىنشا ەلىمىزدىڭ تاجىريبەسىن ۇيرەنۋدىڭ پايدالى ەكەندىگىن ايتتى.
