ۇكىمەت باسشىسى قاي سالادا كادرعا سۇرانىس ارتاتىنىن ەسكەرتتى
بۇل تۋرالى بۇگىن ۇكىمەت وتىرىسىندا ق ر پرەمەر-ءمينيسترى اسقار مامين ايتتى، دەپ حابارلايدى قازاقپارات ءتىلشىسى.
«تەحنولوگيالىق جانە سيفرلىق سەرپىلىستىڭ اسا ماڭىزدى قۇرالدارىنىڭ ءبىرى - ساپالى ادامي كاپيتال. ەلىمىزدىڭ ІТ سالاسىنا جىل سايىن بىرنەشە مىڭ بىلىكتى مامانعا سۇرانىس تۋىندايدى. وسى سالاداعى كادرلارعا دەگەن سۇرانىس ۇنەمى وسەتىن بولادى. دەگەنمەن، قازىرگى تاڭدا بىزدە وسىنداي مامانداردى دايىنداۋ حالىقارالىق ستاندارتتارعا ساي كەلە بەرمەيدى»، - دەدى ۇكىمەت باسشىسى.
ونىڭ ايتۋىنشا، اتالعان مىندەتتى شەشۋ ءۇشىن جاقىندا ەلوردادا حالىقارالىق ІТ ۋنيۆەرسيتەتى اشىلدى. بۇعان قوسا، Astana Hub-تا «الەم» ءبىلىم بەرۋ باعدارلاماسى قولدانىلىپ جاتىر.
«ول فرانسۋزدىق ارىپتەستەرمەن بىرگە دايىندالعان. بەلگىلى امەريكالىق «كۆازار» كومپانياسىمەن بىرگە وسىنداي جوبالاردى باستاۋعا دايىندىق ءجۇرىپ جاتىر. بۇل ءبىرىنشى كەزەڭدە جىل سايىن 1 مىڭنان استام ІТ ماماندارىن وقىتىپ شىعارۋعا مۇمكىندىك بەرەدى. سوندىقتان سيفرلىق دامۋ مينيسترلىگىنە ءبىلىم مينيسترلىگىمەن بىرگە ІТ ماماندارىن ساپالى دايىنداۋ جۇمىسىن الەمدەگى ۇزدىك تاجىريبەلەلەردى قولدانا وتىرىپ جانداندىرۋدى تاپسىرامىن»، - دەدى ول.
ۇكىمەت باسشىسى اقىلدى قالا جوبالارىن ىسكە اسىرۋعا ەرەكشە نازار اۋدارۋ قاجەتتىگىن دە باسا ايتتى.
«قالالاردىڭ تىنىس-تىرشىلىگىنە سيفرلىق تەحنولوگيالاردى ەنگىزۋ ماسەلەسىن ۇكىمەتتىڭ الداعى وتىرىستارىنىڭ بىرىندە قارايتىن بولامىز»، - دەپ ەسكەرتتى اسقار مامين.
