ءاليحان سمايىلوۆ: ازىق-تۇلىك تاۋارلارىنىڭ باعاسى ەرەكشە باقىلاۋدا بولادى
بۇل تۋرالى بۇگىن ۇكىمەت وتىرىسىندا ق ر پرەمەر-ءمينيسترىنىڭ ءبىرىنشى ورىنباسارى - قارجى ءمينيسترى ءاليحان سمايىلوۆ ايتتى، دەپ حابارلايدى قازاقپارات ءتىلشىسى.
«الەۋمەتتىك ماڭىزى بار ازىق-تۇلىك تاۋارلارىنىڭ باعاسىن تۇراقتاندىرۋ بويىنشا قىسقا جانە ورتا مەرزىمدى شارالار توپتاماسى ازىرلەنىپ، قازىر جۇزەگە اسىرىلۋدا. وسى شارالار توپتاماسىنا ارىپتەستەرىمىز، اكىمدەر باسا نازار اۋدارۋى كەرەك. قىسقا مەرزىمدى شارالار اياسىندا ازىق-تۇلىك باعاسىن وسىرمەۋ ءۇشىن اۋىل شارۋاشىلىعى مينيسترلىگى جەرگىلىكتى اتقارۋشى ورگاندارمەن بىرلەسىپ، ماڭىزدى ازىق-تۇلىك تۇرلەرى بويىنشا ءوندىرۋ، ەكسپورت، يمپورت بويىنشا جانە تۇتىنۋ بالانستارىن ازىرلەۋى ءتيىس. وسى بالانستاردىڭ نەگىزىندە ءار ءوڭىر ىشكى نارىقتاعى ازىق-تۇلىك ۇسىنىستىڭ كەرەكتى كولەمىن قامتاماسىز ەتۋى ءتيىس»، - دەدى ول.
ۆيتسە-پرەمەردىڭ ايتۋىنشا، ول ءۇشىن اۋىل شارۋاشىلىعى تاۋارىن وندىرۋشىلەرىن سۋبسيديالاۋ جانە مەملەكەتتىك قولداۋ كورسەتۋ شارالارىن ۇسىنۋ كەزىندە اۋىل شارۋاشىلىعى مينيسترلىگىمەن بىرلەسىپ، ءار وڭىردە باعا وسىمىنە جول بەرمەۋ، ازىق-تۇلىك وندىرۋشىلەردىڭ ىشكى نارىقتى قامتاماسىز ەتۋ ءۇشىن ناقتى قارسى مىندەتتەمەلەرىن بەلگىلەۋ قاجەت.
«سونىمەن بىرگە تۇراقتاندىرۋ قورلارىنىڭ ءتيىمدى جۇمىسىن قامتاماسىز ەتۋ كەرەك. باسقا دا ءبىرقاتار شارا اتالعان توپتاماسىندا بەلگىلەنگەن. باعالاردى تۇراقتى ۇستاۋ ماسەلەسى ءبىزدىڭ ەرەكشە باقىلاۋىمىزدا بولادى»، - دەدى ءاليحان سمايىلوۆ.
