اسقار مامين اكىمدەرگە ەسكەرتۋ جاسادى

نۇر-سۇلتان. قازاقپارات - اكىمدەر باعانىڭ ءوسۋ ماسەلەسىن ەرەكشە باقىلاۋدا ۇستاۋى ءتيىس.

بۇل تۋرالى بۇگىن ۇكىمەت وتىرىسىندا ق ر پرەمەر-ءمينيسترى اسقار مامين ايتتى، دەپ حابارلايدى قازاقپارات ءتىلشىسى.

«ق ر تۇڭعىش پرەزيدەنتى نۇرسۇلتان نازاربايەۆ بەلگىلەپ بەرگەن ستراتەگيالىق مىندەت - حالىقتىڭ تابىسى مەن تۇرمىس ساپاسىن ارتتىرۋ. سوندىقتان دا الەۋمەتتىك ماڭىزى بار تاۋارلار باعاسىن تۇراقتاندىرۋ ماسەلەسىنىڭ ماڭىزى وتە زور. ۇكىمەتتىڭ كەڭەيتىلگەن وتىرىسىندا مەملەكەت باسشىسى قاسىم-جومارت توقايەۆ وسى باعىتتا جۇيەلى شارالاردى قابىلداۋدى تاپسىردى. مەملەكەتتىك ورگاندار مەن اكىمدىكتەر ساۋدا مينيسترلىگى ۇسىنىپ وتىرعان شارالار توپتاماسىن ۋاقىتىلى ءارى تولىق ورىنداۋى ءتيىس»، - دەدى ۇكىمەت باسشىسى.

سونىمەن بىرگە پرەمەر-مينيستر ءبىرقاتار ماسەلەگە توقتالىپ ءوتتى.

«ءبىرىنشى، بىلتىر قاراشا ايىندا باعالاردى تۇراقتاندىرۋ جۇمىسىندا جىبەرگەن كەمشىلىكتەرى ءۇشىن ءوڭىر اكىمدەرىنىڭ ءبىراز ورىنباسارى جاۋاپقا تارتىلعان بولاتىن. قابىلدانعان شارالاردىڭ ناتيجەسىندە جەلتوقسان ايىندا اكىمدىكتەر باعانى ۇستاپ تۇرۋ بويىنشا جاقسى وزەرىستەرگە قول جەتكىزدى. مىسالى بىلتىرعى قاراشادا الەۋمەتتىك ماڭىزى بار ازىق-تۇلىك تاۋارلارىنىڭ باعاسى 1,1 پايىزعا وسسە، جەلتوقساندا بۇل ءوسىم بار بولعانى 0,1 پايىزدى كورسەتتى»، - دەدى ول.

ونىڭ اتاپ وتۋىنشە، مۇنىڭ ءوزى وسى باعىتتاعى جۇمىستى جالعاستىرۋ ءۇشىن وڭىرلەردە قاجەتتى قوردىڭ بار ەكەنىن كورسەتەدى.

«دەگەنمەن، قاڭتاردىڭ سوڭىندا الەۋمەتتىك ماڭىزى بار تاۋارلاردىڭ باعاسى 0,3 پايىزعا وسكەنىن كورىپ وتىرمىز. اكىمدەر باعانىڭ ءوسۋ ماسەلەسىن ەرەكشە باقىلاۋدا ۇستاپ، ول وزگەرگەن جاعدايدا جەدەل شارالاردى قابىلداۋى ءتيىس ەكەنىن ەسكەرتەمىن»، - دەدى اسقار مامين.

سونىمەن قاتار ول ەكىنشىدەن، ساۋدا جانە ينتەگراتسيا مينيسترلىگىنە قارجى، اۋىل شارۋاشىلىعى مينيسترلىكتەرىمەن بىرگە كوتەرمە ساتۋ جانە اگرو-لوگيستيكالىق ورتالىق قۇرۋ جوبالارىن قارجىلاندىرۋ قۇرىلىمىن ءبىر اپتانىڭ ىشىندە بەلگىلەۋدى تاپسىردى.

«ۇشىنشىدەن، اۋىل شارۋاشىلىعى مينيسترلىگى مەن اكىمدىكتەر الەۋمەتتىك ماڭىزى بار ازىق-تۇلىك تاۋارلارىنىڭ ءوندىرىسىن كەڭەيتۋ ءۇشىن قاجەتتى جاعداي جاساۋى ءتيىس. ىشكى نارىقتى وتاندىق ازىق-تۇلىكپەن قامتاماسىز ەتۋ - اۋىل شارۋاشىلىعى تاۋارلارىن وندىرۋشىلەر سۋبسيديا العان كەزدەگى مىندەتتەمەلەردىڭ ءبىرى بولۋى كەرەك»، - دەدى ۇكىمەت باسشىسى.