سۋ تاسقىنى بولۋى مۇمكىن وڭىرلەر اتالدى

نۇر-سۇلتان. قازاقپارات - «قازگيدرومەت» ر م ك كوكتەمگى سۋ تاسقىنى كەزەڭىنە الدىن الا كونسۋلتاتيۆتىك گيدرولوگيالىق بولجام جاسادى، دەپ حابارلايدى قازاقپارات.

«گيدرومەتەورولوگيالىق باقىلاۋ دەرەكتەرىنە سايكەس، 2020-جىلدىڭ 31- قاڭتارىنداعى جاعداي بويىنشا س ق و، ش ق و، قاراعاندى، اقمولا جانە قوستاناي وبلىستارىندا قار جابىنىنداعى ىلعال قورى ورتاشا نورمادان جوعارى. قار جيناۋ پروتسەسى اقپان جانە ناۋرىز ايلارىندا جالعاساتىنىن ايتا كەتكەن ءجون»، - دەپ حابارلادى «قازگيدرومەت» ر م ك باسپا ءسوز قىزمەتى.

كوپ جىلدىق باقىلاۋ دەرەكتەرى بويىنشا اقپان، ناۋرىز، ءساۋىر ايلارىندا جاۋىن-شاشىننىڭ ايلىق نورماسى ءتۇسۋى ىقتيمال جانە ول قاۋىپتى گيدرومەتەورولوگيالىق قۇبىلىستاردىڭ تۋىنداۋىنا اكەلۋى مۇمكىن.

«ەگەر اقپان ايىندا تەمپەراتۋرا كوتەرىلىپ، كوپ جاۋىن-شاشىن جاۋسا، قازاقستاننىڭ وڭتۇستىك، وڭتۇستىك- شىعىس جانە شىعىس تاۋلى وزەندەرىندە ەرىگەن قار مەن جاڭبىردان سۋ تاسقىنى بولۋى مۇمكىن. 2020-جىلدىڭ اقپان ايىنا ارنالعان سينوپتيكالىق بولجامعا سايكەس، اۋا تەمپەراتۋراسى مەن جاۋىن-شاشىن مولشەرى قازاقستان اۋماعىنىڭ باسىم بولىگىندە كليماتتىق نورمادان جوعارى بولادى دەپ كۇتىلۋدە»، - دەلىنگەن حابارلامادا.

سينوپتيكالىق بولجامعا سايكەس، اقپان ايىنىڭ العاشقى ون كۇندىگىندە كۇندىزگى جانە تۇنگى اۋا تەمپەراتۋراسى كوتەرىلەدى، ولار قاردىڭ ەرۋىنە، ەرىگەن قار سۋىنىڭ پايدا بولۋىنا، مۇز كەپتەلىستەرىنىڭ پايدا بولۋىنا جانە قىزىلوردا، شىعىس قازاقستان، الماتى، جامبىل، تۇركىستان وبلىستارىنىڭ وزەندەرىندەگى سۋدىڭ جايىلۋىنا اكەپ سوعۋى مۇمكىن.

كوكتەمگى كەزەڭگە نەگىزگى گيدرولوگيالىق بولجام 2020-جىلدىڭ ناۋرىزىندا ازىرلەنەدى جانە 2018-2019-جىلدارعا ۇقساس قىسقا مەرزىمدى جانە ورتاشا مەرزىمدى گيدرولوگيالىق بولجامدار اپتا سايىن (ءار 3 كۇن سايىن ناقتىلاۋمەن) ۇسىنىلاتىن بولادى.