اۋىل شارۋاشىلىعىن قولداۋ شارالارىن ۇلعايتۋى قاجەت- مينيسترلىك

نۇر- سۇلتان. قازاقپارات - قازاقستان الداعى ۋاقىتتا اگروونەركاسىپ كەشەنىندە مەملەكەتتىك قولداۋ شارالارىن كۇشەيتىپ، نارىقتاعى كولەڭكەلى فالسيفيكاتورلاردى ىسىرۋى ءتيىس.

وتاندىق ءونىمدى قولداۋ شارالارىنا قاتىستى ق ر اۋىل شارۋاشىلىعى مينيسترلىگى وسىنداي قاعيدات ۇستانىپ وتىر، دەپ حابارلايدى قازاقپارات ءتىلشىسى.

ق ر اۋىل شارۋاشىلىعى ءبىرىنشى ۆيتسە- ءمينيسترى ايداربەك ساپاروۆانىڭ ايتۋىنشا، 2020 -جىلدىڭ 1 - قاڭتارىنداعى جاعداي بويىنشا قازاقستاندا اۋىل شارۋاشىلىعىنىڭ 776 ينۆەستيتسيالىق جوبادان تۇراتىن ينۆەستيتسيالىق پورتفەلى 611 ميلليارد تەڭگەنى قۇراپ وتىر.

«2019 -جىلدىڭ باستى جۇمىس قورىتىندىسى رەتىندە 172 مىڭ باس ءىرى قارانى ساتىپ الىنىپ، 10 ءسۇت ونىمدەرى فەرماسىنىڭ اشىلعانىن اتاپ وتۋگە بولادى. سونىمەن بىرگە، بىلتىر جىلىنا 36 مىڭ توننا تاۋىق ەتىن وندىرەتىن قۇس شارۋاشىلىعى سالاسىندا ەكى جوبا ىسكە استى. 11 ءىرى جىلىجاي سالىنىپ، 98,5 ميلليارد تەڭگەگە 5893 دانا تەحنيكا بەرىلدى» ، - دەدى ول پارلامەن سەناتىندا ءوتىپ جاتقان دوڭگەلەك ۇستەلدە.

ۆيتسە- مينيستر ايتسە دە قازىر ەۋرازيالىق ەكونوميكالىق وداقتاعى ەلدەردەگى سەرىكتەستەرىمىزدەن قاراعاندا قازاقستاندا مەملەكەتتىك قولداۋ دەڭگەيى تومەن ەكەنىن ايتادى. ماسەلەن، بەلارۋس جالپى ىشكى ءونىمنىڭ 8,1 پايىزىن، رەسەي 6,3 پايىزىن اۋىل شارۋاشىلىعىن قولداۋعا جۇمسايدى. ال بىزدە قازاقستاندا بۇل كورسەتكىش 5 پايىزدى عانا قۇرايدى.

«كورشى ەلدەرمەن سالىستىرا وتىرىپ، كەلتىرىلگەن مالىمەتتەرگە سۇيەنسەك، قازاقستان ا و ك سالاسىن قولداۋ جاعىنان ولاردان قالىپ بارا جاتىر. وسى سەبەپتى، رەسەيلىك جانە وزبەكستاندىق اۋىل شارۋاشىلىعى ونىمدەرى بىزدىكىنەن قاراعاندا باسەكەگە قابىلەتتى. وسىعان بايلانىستى قازاقستان بۇل باعىتتا مەملەكەتتىك قولداۋ شارالارىن كۇشەيتىپ، كورشى ەلدەردىڭ تاجىريبەسىنە سۇيەنىپ، قولداۋ مەحانيزمدەرىنىڭ ءتىزىمىن ۇزارتۋى كەرەك. سونىمەن قاتار، مەملەكەتتىك قولداۋ شارالارىن ۇلعايتا وتىرىپ، قازاقستاندا وندىرىلگەن ءونىمدى وتكىزۋ ىسىنە مىقتاپ كىرىسۋ كەرەك. ول ءۇشىن نارىقتاعى يمپورتتىق فالسيفيكاتورلاردى ىسىرعان ابزال. ايتپەسە، ءبىزدىڭ ءىسىمىزدىڭ ءبارى ناتيجەسىز اياقتالۋى مۇمكىن» ، - دەدى ول.