جاساندى ۇرىقتاندىرۋ ارقىلى تۋعان بالالار بەدەۋ بولمايدى - پروفەسسور

الماتى. قازاقپارات - ەكستراكورپورالدى ۇرىقتاندىرۋ ارقىلى تۋعان بالالار ۇرپاق ءسۇيۋ باقىتىنان قالىس قالمايدى.

بۇل تۋرالى سانجار اسفەندياروۆ اتىنداعى قازاق ۇلتتىق مەديتسينالىق ۋنيۆەرسيتەتىنىڭ ۇجىمىمەن كەزدەسۋ بارىسىندا قازاقستان رەپرودۋكتيۆتى مەديتسينا قاۋىمداستىعىنىڭ پرەزيدەنتى، ق ر ۇ ع ا كوررەسپوندەنت مۇشەسى، مەديتسينا عىلىمدارىنىڭ دوكتورى ۆياچەسلاۆ لوكشين ايتتى، دەپ حابارلايدى قازاقپارات ءتىلشىسى.

پروفەسسور رەپرودۋكتيۆتى مەديتسينا سالاسىنداعى جەتىستىكتەرمەن ءبولىسىپ، ەكستراكورپورالدى ۇرىقتاندىرۋ سالاسىنداعى جالعان قاۋەسەتتەردى جوققا شىعاردى.

الەمدىك ستاتيستيكاعا سۇيەنسەك، وتباسىلىق جۇپتاردىڭ 10-15 پايىزى بالا ءسۇيۋ مۇمكىندىگىنەن قاعىلعان.

كوبىنەسە وعان كەش ۇيلەنۋ سەبەپ بولىپ جاتىر. وسى ورايدا ەكستراكورپورالدى ۇرىقتاندىرۋ ماسەلەسى وزەكتى بولىپ كەلەدى.

عالىمدار قازىر ەمبريوننىڭ ساپاسىن ادامنان دا ناقتى انىقتاپ بەرەتىن جاساندى ينتەللەكت يەسىن، ياعني روبوت ويلاپ تاپتى.

2017-جىلدىڭ مامىرىندا عالىمدار بەدەۋ تىشقاندارعا انالىق جۇمىرتقالاردى 3D فورماتتا باسىپ شىعارىپ، سونىڭ ارقاسىندا تىشقاندار تولدەگەن.

چيكاگو سولتۇستىك-باتىس ۋنيۆەرسيتەتىنىڭ عالىمدارى جاساندى انالىق جۇمىرتقا جاساپ شىعاردى. بۇل جۇمىرتقا رەپرودۋكتيۆتى جۇيەنى تولىق قالپىنا كەلتىرۋگە مۇمكىندىك بەرمەك.

ال پروفەسسور شۋحرات ميتاليپوۆ 2017-جىلى ادام ەمبريونىن ءبىرىنشى رەت رەداكتسيالاپ شىعاردى.

ۆياچەسلاۆ لوكشين بۇل تەحنولوگيالار ارى قاراي داميتىنىن ايتتى. ەندىگى جەردە عىلىمنىڭ الدىنداعى بەلگىسىزدىك ەمەس، زاڭ جانە ەتيكا سالاسىنىڭ ساۋالدارى وزەكتى بولماق.

ونىڭ ايتۋىنشا قازاقستاندا 2019-جىلى ە ك ۇ بويىنشا 9000 باعدارلاما جاسالعان. كليەنتتەردىڭ 11 پايىزى الەمنىڭ 38 ەلىنەن كەلگەن.

الەمدە 8 ميلليون بالا ە ك ۇ ارقىلى تۋعان.

«قازاقستاندا ە ك ۇ باعدارلاماسى – ا ق ش- تان 7-8 ەسە، ەۋروپادان - 5 ەسە، رەسەيدەن 2 ەسە ارزان. قازاقستاندا جىل سايىن 2200 اسا بالا ە ك ۇ ارقىلى تۋادى. 1996-جىلدان 2019-جىلعا دەيىن 19 مىڭ بالا دۇنيە ەسىگىن اشقان. ە ك ۇ ءساتتى بولۋى ءۇشىن 3-4 رەت جاسالعانى دۇرىس. سەبەبى جۇكتىلىك بولۋ ىقتيمالدىعى 40 پايىز بولادى. جاس ۇلكەيگەن سايىن بۇل پايىز ازايادى. بىلتىر ءبىزدىڭ ەمحانادا 47 جاستاعى ايەل بوساندى. كوپشىلىگىمىز جۇكتىلىك بولارىنا سەنبەدىك. ماكسيمۋم 35-36 جاسقا دەيىن ايەلدەر ءوز انالىق ۇرىعىن ساقتاپ قويا الادى»، - دەدى پروفەسسور.

ونىڭ ايتۋىنشا، ە ك ۇ ارقىلى تۋعان بالالار وزدەرى پەرزەنت سۇيە المايدى دەگەن قاۋەسەت جالعان ەكەندىگىن ايتتى.

ەگەر بالانىڭ اتا-اناسى جاتىر تۇتىكتەرىنىڭ بىتەۋلىگىنەن، قابىنۋ پروتسەستەرىنىڭ كەسىرىنەن بالالى بولا الماي ە ك ۇ- عا جۇگىنسە، وندا ودان تۋعان بالالاردا پەرزەنت سۇيۋدەن پروبلەما بولمايدى.

الەمدە جاساندى ۇرىقتاندىرۋمەن تۋعان 15-20 مىڭ بالا وزدەرى بالالى بولىپ وتىر.