وڭىرلەردە اتاۋلى الەۋمەتتىك كومەكتەن تىس قالعان وتباسىلارعا دەمەۋشىلەر كومەكتەسەدى - بەردىبەك ساپاربايەۆ
بۇل تۋرالى ءماجىلىس دەپۋتاتتارىمەن كەزدەسۋ كەزىندە ق ر پرەمەر-ءمينيسترىنىڭ ورىنباسارى بەردىبەك ساپاربايەۆ ءمالىم ەتتى، دەپ حابارلايدى قازاقپارات ءتىلشىسى.
«ەڭ ۇلكەن ماسەلەنىڭ ءبىرى - ول اتاۋلى الەۋمەتتىك كومەككە وزگەرىستەر ەنگىزۋگە بايلانىستى، ياعني جاڭا تەتىككە قاتىستى بولىپ وتىر. ءبىزدىڭ اتقارىپ وتىرعان جۇمىستارىمىزعا توقتالساق، بارلىق اۋىلدىق وكرۋگتەن باستاپ وبلىس ورتالىقتارىنا دەيىن شتابتار قۇرىلدى. جاۋاپتى ادامدار بەكىتىلدى. كۇنىنە ەكى رەت وڭىرلەردەن مالىمەت الىپ تۇرامىز. وعان قوسىمشا، تابىسىنا قاراي كەيبىرەۋلەر قازىرگى الىپ وتىرعان اتاۋلى الەۋمەتتىك كومەكتەن تىس قالۋى مۇمكىن. سوندىقتان جەرگىلىكتى ورگاندارعا تاپسىرما بەرىلگەن، الەۋمەتتىك كومەكتەن تىس قالعان وتباسىلارىنا جەرگىلىكتى جەردەن دەمەۋشىلەردىڭ كومەگىمەن قولداۋ جاساۋ ەسكەرىلىپ وتىر. ارينە، ولاردى جۇمىسپەن قامتاماسىز ەتۋگە ەرەكشە ەكپىن قويىلادى»، - دەدى ب. ساپاربايەۆ.
ونىڭ سوزىنە قاراعاندا، بۇگىندە جاڭادان تاعايىندالعان مەملەكەتتىك كومەك اياسىندا 372 مىڭ وتباسىنا 17 ميلليارد تەڭگە تولەندى.
«وزدەرىڭىز بىلەسىزدەر، ەڭ ماڭىزدى شارالار ەڭبەكپەن قامتۋعا ارنالادى. ول ءۇشىن جەرگىلىكتى بيلىك ورگاندارى بەلسەندى جۇمىستاردى اتقارۋى كەرەك. وسى ورايدا وڭىرلەرمەن تىعىز بايلانىستا قاجەتتى قادامدار پىسىقتالۋدا. بىزدە وتباسىلار بويىنشا مالىمەتتەر بازاسى بار. قازىرگى كەزدە جەرگىلىكتى ورگاندارمەن بۇل وتباسىلاردى جۇمىسپەن قامتىلۋىن قامتاماسىز ەتۋگە ەكپىن قويىلىپ وتىر. بۇل تۇرعىدا وسى ادامداردىڭ وزدەرىنىڭ بيزنەستەرىن اشۋىنا قولداۋ جاسالادى»، - دەدى ۇكىمەت باسشىسىنىڭ ورىنباسارى.
ەستەرىڭىزگە سالا كەتسەك، 2020-جىلدان باستاپ وتباسىندا بىرگە تۇراتىن كامەلەتكە تولماعان ءتورت جانە ودان دا كوپ بالالارى، ونىڭ ىشىندە 23 جاسقا دەيىن ستۋدەنت بالالارى بار وتباسىلارعا تولەنەتىن مەملەكەتتىك جاردەماقى كولەمى مىناداي: 4 بالاعا - 42496 تەڭگە، 5 بالاعا - 53127 تەڭگە، 6 بالاعا - 63757 تەڭگە، 7 جانە ودان كوپ بالاعا - 74388 تەڭگە.
