09:53, 30 - قاڭتار 2020 | GMT +5
بەلارۋس پرەزيدەنتى قازاقستان مۇنايى بويىنشا كەلىسسوزدەر جۇرگىزۋدى تاپسىردى
مينسك. بەلتا-قازاقپارات - بەلارۋس پرەزيدەنتى الەكساندر لۋكاشەنكو ەل ۇكىمەتىنە بەلارۋسكە مۇناي جانە مۇناي ونىمدەرىن جەتكىزۋ سالاسىندا قازاقستانمەن ساۋدا-ەكونوميكالىق ىنتىماقتاستىق تۋرالى كەلىسسوزدەر جۇرگىزۋگە ۋاكىلەتتىك بەردى.
بۇل تۋرالى بەلتاعا ەل كوشباسشىسىنىڭ باسپا ءسوز قىزمەتىنەن ءمالىم ەتتى.
اگەنتتىكتىڭ جازۋىنشا، مەملەكەت باسشىسى الەكساندر لۋكاشەنكو 27№ جارلىعىمەن بەلارۋسكە مۇناي جانە مۇناي ونىمدەرىن جەتكىزۋ سالاسىندا قازاقستانمەن ساۋدا-ەكونوميكالىق ىنتىماقتاستىق جونىندە، سونداي-اق كەلىسىم جوباسى جانە ماقۇلدانعان جوبا شەڭبەرىندە ۋاعدالاستىققا قول جەتكىزىلگەن جاعدايدا وعان قول قويۋ بويىنشا بەلارۋس ۇكىمەتىنە كەلىسسوزدەر جۇرگىزۋگە ۋاكىلەتتىك بەردى.
«بۇعان دەيىن ا. لۋكاشەنكو بەلارۋسكە مۇناي تاسىمالىن ۇيىمداستىرۋ ءۇشىن الەۋەتتى مۇمكىندىگى بار مەملەكەتتەر اراسىندا قازاقستاندى بىرنەشە مارتە اتاپ وتكەن بولاتىن. بۇل ماسەلە سونداي-اق وتكەن جىلدىڭ قازان ايىندا بەلارۋس مەملەكەتى باسشىسىنىڭ قازاقستانعا رەسمي ساپارى بارىسىندا تالقىلانعان بولاتىن»، - دەلىنگەن اقپاراتتا.
