ءبىز ۇلى ويشىل ابايدى الەمگە لايىقتى دەڭگەيدە تانىتا الماي كەلەمىز - پرەزيدەنت
نۇر-سۇلتان. قازاقپارات - قازىرگى وركەنيەتتى مەملەكەتتەردىڭ بارلىعى دەرلىك شوقتىعى بيىك تاريحي تۇلعالارىمەن ماقتانا الادى.
ولاردىڭ قاتارىندا ساياساتكەرلەر، مەملەكەت جانە قوعام قايراتكەرلەرى، قولباسشىلار، اقىن-جازۋشىلار، ونەر جانە مادەنيەت مايتالماندارى بار. قازاق جۇرتى دا ءبىرتۋار پەرزەنتتەردەن كەندە ەمەس. سولاردىڭ ىشىندە ابايدىڭ ورنى ەرەكشە. ءبىراق ءبىز ۇلى ويشىلىمىزدى جاھان جۇرتىنا لايىقتى دەڭگەيدە تانىتا الماي كەلەمىز.
مەملەكەت باسشىسى بۇگىن جاريالاعان «اباي جانە ХХІ عاسىرداعى قازاقستان» اتتى ماقالاسىندا وسىلاي دەپ جازدى.
«مەن كوپ جىلعى ديپلوماتيالىق قىزمەتىمدە باسقا ەلدەردىڭ ساياساتكەرلەرىمەن، ءتۇرلى سالا ماماندارىمەن ءجيى كەزدەستىم. شەتەلدىكتەرمەن ادامزاتقا ورتاق كوپتەگەن تۇيتكىلدى ماسەلەلەر تۋرالى پىكىر الماسىپ، وي ءبولىستىم. جالپى، ولار قازاقستاننىڭ ساياسي جانە ەكونوميكالىق جەتىستىكتەرى جونىندە جاقسى بىلەدى. ال، رۋحاني جانە مادەني قۇندىلىقتارىمىزبەن جەتە تانىس ەمەس. وسى ورايدا «نەگە قازاقتىڭ ءبىتىم-بولمىسىن، مادەنيەتىن اباي ارقىلى تانىتپايمىز؟»، - دەگەن سۇراق تۋىندايدى.
عۇلاما اباي - قازاق توپىراعىنان شىققان الەمدىك دەڭگەيدەگى كەمەڭگەر. ول كۇللى ادامزات بالاسىنا اقىل-ويدىڭ جەمىسىن سىيلادى.
ابايدىڭ اقىندىق قۋاتىنىڭ تەرەڭ تامىرىنا ۇڭىلگەن زەرتتەۋشىلەرىمىز ونىڭ قازاق فولكلورىنان، شىعىس پەن باتىستىڭ ءسوز ونەرىنەن، ورىس ادەبيەتىنەن، تاريحي ەڭبەكتەردەن سارقىلماس ءنار العانىن ايتادى» دەلىنگەن پرەزيدەنت ماقالاسىندا.
سونداي-اق، مەملەكەت باسشىسى اقىننىڭ ءدىني كوزقاراسى ارقىلى دا بيىكتەي بەرەتىن تۇلعا ەكەنىنە باسا نازار اۋدارعان.
«ابايدىڭ اسقان ويشىلدىعى ونىڭ ءدىني تالعام-تانىمىنان دا ايقىن كورىنەدى. «اللانىڭ ءوزى دە راس، ءسوزى دە راس، راس ءسوز ەشۋاقىتتا جالعان بولماس»، - دەيدى ول. بۇل وي-تۇجىرىمعا ول شىعىس پەن باتىس فيلوسوفتارىنىڭ ەڭبەكتەرىن تەرەڭ ءبىلىپ، زەرتتەپ، زەردەلەپ بارىپ جەتكەنى انىق. ول وتىز سەگىزىنشى قارا سوزىندە اللاعا دەگەن كوزقاراسىن تولىق بىلدىرەدى. ابايدىڭ رۋحاني ورەسىنە باعا بەرگەن ءدىنتانۋشى فيلوسوف عالىمدار ونىڭ «كامىل مۇسىلمان» ۇعىمىنا ەرەكشە نازار اۋدارادى. «كامىل مۇسىلمان» ۇعىمى تەك قازاققا عانا ەمەس، بۇكىل مۇسىلمان الەمىنە قاتىستى ايتىلسا كەرەك. مىنە، ءبىزدىڭ ويشىل اباي، حاكىم اباي - الەمدىك دەڭگەيدە وسى ءدىني كوزقاراسى ارقىلى دا بيىكتەي بەرەتىن تۇلعا» دەپ جازىلعان ماقالادا.
پرەزيدەنت پايىمىنشا، ەلوردادا بارلىق ءدىننىڭ باسىن قوسىپ، ءداستۇرلى جيىن وتكىزىپ كەلە جاتقانىمىز بەن ۇلى اباي ۇستانىمىنىڭ اراسىندا ءوزارا ۇيلەسىمدىلىك بار.
ايتا كەتەيىك، بۇعان دەيىن «قازاقپارات» اگەنتتىگى اقوردانىڭ رەسمي سايتىنا سىلتەمە جاساي وتىرىپ، قاسىم-جومارت توقايەۆتىڭ «اباي جانە ХХІ عاسىرداعى قازاقستان» اتتى ماقالاسىن جاريالاعان بولاتىن.
