ق ر پرەزيدەنتى: اباي ءوز زامانىنداعى ىسكەرلىكتىڭ ۇيىتقىسى، ەڭبەكقورلىقتىڭ موتيۆاتورى
بۇل تۋرالى مەملەكەت باسشىسى قاسىم-جومارت توقايەۆتىڭ «اباي جانە ХХІ عاسىرداعى قازاقستان» اتتى ماقالاسىندا ايتىلعان.
اۆتور وندا اباي شىعارماشىلىعىنا ارقاۋ بولعان تاقىرىپتىڭ ءبىرى - ماسىلدىقپەن كۇرەس ەكەنىن ايتادى.
«اقىن ۇنەمى ۋايىمسىز سالعىرتتىققا، ويىن-كۇلكىگە سالىنباي، سەرگەك بولۋعا ۇندەيدى. ونى ۇدايى ەڭبەك ارقىلى شىڭداپ وتىرۋدى قۇپ كورەدى. سونىمەن قاتار، ورىندى ارەكەتتىڭ ۋايىم-قايعىنى جەڭەتىنىن دالەلدەپ، ماسىلدىقپەن كۇرەستىڭ پسيحولوگيالىق قىرلارىنا تەرەڭ بويلايدى. قازىر ءبىز كوپ ايتىپ جۇرگەن ەموتسيونالدى ينتەللەكتىگە دە سول تۇستا نازار اۋداردى. ماقتان مەن ماسىلدىق پسيحولوگيادان ارىلىپ، قايراتتانىپ ەڭبەك ەتۋدى، تالاپتانىپ ءبىلىم ىزدەۋدى ناسيحاتتاعان»، - دەپ جازادى مەملەكەت باسشىسى.
سونداي-اق پرەزيدەنتتىڭ جازۋىنشا، اباي ولەڭدەرىندەگى «ەڭبەك ەتسەڭ ەرىنبەي، تويادى قارنىڭ تىلەنبەي»، «تاماعى توقتىق، جۇمىسى جوقتىق، ازدىرار ادام بالاسىن»، «وزىڭە سەن، ءوزىڭدى الىپ شىعار، ەڭبەگىڭ مەن اقىلىڭ ەكى جاقتاپ» - دەگەن قازىنالى ويلار بارىمىزگە جاقسى تانىس. ءار ادام وسى ءتۇيىندى تۇجىرىمداردى ساناسىنا بەرىك توقىپ، ءوزىنىڭ تىنىمسىز، ادال ەڭبەگىمەن اينالاسىنا ۇلگى بولۋى كەرەك.
«حالقىمىز ەڭبەكتىڭ ءقادىرىن بىلەدى. ءبىز اتا-انالارىمىزدىڭ تىلداعى اۋىر ەڭبەگى جەڭىسكە جەتەلەگەن وراسان كۇشكە اينالعانىن ۇمىتقان جوقپىز. قازىر دە قاراپايىم ەڭبەك ادامدارىنىڭ ۇلگىلى ىستەرى جەتەرلىك. جاقىندا سولاردىڭ ءبىرازى مەملەكەتتىك ناگرادالارمەن ماراپاتتالدى. ەڭ باستىسى، بۇگىنگىدەي بەيبىت كەزەڭدە ءار ازامات ءوزىنىڭ ەسەلى ەڭبەگى ەلىمىزدىڭ ەكونوميكاسىن ىلگەرىلەتۋگە تىكەلەي ىقپال ەتەتىنىن ءتۇسىنۋى قاجەت»، - دەيدى قاسىم- جومارت توقايەۆ ماقالاسىندا.
سونداي-اق مەملەكەت باسشىسىنىڭ جازۋىنشا، ابايدى ءوز زامانىنداعى ىسكەرلىكتىڭ ۇيىتقىسى، ەڭبەكقورلىقتىڭ موتيۆاتورى دەۋگە بولادى. ۇلى ويشىل شىعارمالارىندا كاسىپتەن ءناسىپ تاپقانداردى، شارۋاقورلىققا ۇيرەنۋ داعدىلارىن ۇلگى ەتەدى. ول تۇرمىس ساپاسىن جاقسارتۋ ءۇشىن ەڭبەك ەتۋدىڭ جاڭا تاسىلدەرىن مەڭگەرۋگە شاقىرادى. سونىمەن قاتار اقىن باستاماشىلدىقتى، كاسىپتەگى ادالدىقتى جوعارى قويادى. مىسالى، ءوزىنىڭ ونىنشى قارا سوزىندە «ەرىنبەي ەڭبەك قىلسا، تۇڭىلمەي ىزدەسە، ورنىن تاۋىپ ىستەسە، كىم باي بولمايدى؟»، - دەپ تۇجىرىم جاسايدى.
ابايدىڭ ويىنشا، تابىس تابۋ ءۇشىن قولونەر ۇيرەنۋ كەرەك. سەبەبى «مال جۇتايدى، ونەر جۇتامايدى» (وتىز ءۇشىنشى قارا ءسوز).
«ۇلى اقىننىڭ بۇل ويلارى بۇگىنگى قازاقستان قوعامى ءۇشىن دە وزەكتى دەپ سانايمىن. سوندىقتان ءبىز بۇگىنگى تاڭدا شيكىزاتقا تاۋەلدىلىك پسيحولوگياسىنان ارىلۋدى، شاعىن جانە ورتا بيزنەستى بارىنشا وركەندەتۋدى نەگىزگى باسىمدىقتىڭ ءبىرى رەتىندە بەلگىلەپ وتىرمىز»، - دەلىنگەن ماقالادا.
ماقالانى قازاقپارات بۇگىن اقوردانىڭ باسپا ءسوز قىزمەتىنە سىلتەمە جاساپ جاريالادى.
