التاي كولگىنوۆ ەلوردانىڭ باستى ماسەلەسىن اتادى

بۇل تۋرالى ەلوردا اكىمى التاي كولگىنوۆ ايتتى، دەپ حابارلايدى قازاقپارات ءتىلشىسى.

«نۇر-سۇلتان قالاسىن ەۋرازيانىڭ ىسكەر، مادەني جانە عىلىمي ورتالىعى ەتە وتىرىپ، جاستاردى، كاسىپكەرلەر مەن تۋريستەردى تارتۋ ءبىزدىڭ نەگىزگى تەمىرقازىعىمىز. قاسىم- جومارت كەمەل ۇلى، ءسىزدىڭ سايلاۋالدى باعدارلاماڭىز بەن قازاقستان حالقىنا جولداۋىڭىزدا قويىلعان نەگىزگى مىندەتتەر ەلوردامىزدى ەكونوميكالىق جانە الەۋمەتتىك باستامالار جۇزەگە اسىرۋىنا مۇمكىنشىلىك اشىپ وتىر. نەگىزگى باسىمدىق قالا تۇرعىندارىنىڭ ءومىر ساپاسىن جاقسارتۋعا، ازاماتتارمەن ءتيىمدى كەرى قاتىناس پەن تىعىز بايلانىس ورناتۋعا بەرىلۋدە»، - دەدى ەلوردا اكىمى مەملەكەت باسشىسى قاسىم-جومارت توقايەۆتىڭ توراعالىعىمەن ءوتىپ جاتقان ەلوردانى ودان ارى دامىتۋ ماسەلەلەرى جونىندەگى ماجىلىستە.

ونىڭ ايتۋىنشا، نۇر-سۇلتان قالاسىندا حالىق سانىنىڭ تۇراقتى ءوسۋى بايقالادى. ەلوردانى كوشىرگەن ساتتەن باستاپ حالىق سانى 280 مىڭنان 1 ميلليون 100 مىڭعا ادامعا ارتتى. تۇرعىنداردىڭ دەنى 35 جاسقا دەيىنگى ازاماتتاردى قۇرايدى.

«حالىق سانىنىڭ قارقىندى ءوسۋى الدىمىزعا ءبىرقاتار ماڭىزدى مىندەتتى قويىپ وتىر. اتاپ ايتقاندا - الەۋمەتتىك ينفراقۇرىلىمعا سالماق ءتۇسۋ، قالانىڭ شەتىندەگى ەلدى مەكەندەردى دامىتۋ، ساپالى جۇمىس ورنىنا دەگەن قاجەتتىلك جانە باسقالارى. تۇرعىن ءۇي ماسەلەسىنە كەلسەك، قولجەتىمدى باسپانا باستى ماسەلە بولىپ وتىر. جۇرگىزىلگەن ساۋالناماعا قاتىسقان قالا تۇرعىندارىنىڭ تەڭ جارتىسى باسپانانى نەگىزگى ماسەلە دەپ اتاپ ءوتتى»، - دەدى ول.

ونىڭ ايتۋىنشا، قازىرگى تاڭدا ءۇي كەزەگىندە 47600 ادام تۇر. ولاردىڭ كوبى ءتۇرلى الەۋمەتتىك توپتارعا جاتاتىندار.

«ءسىزدىڭ تاپسىرماڭىزعا سايكەس، قولجەتىمدى باسپانا قۇرىلىسىن ءۇش ەسەگە دەيىن ارتتىرۋعا دايىندىق جۇمىستارىن باستاپ كەتتىك. 2019 -جىلدىڭ قورىتىندىسى بويىنشا بيۋدجەت قارجىسى ەسەبىنەن 190 مىڭ شارشى مەتر بولاتىن 2400 پاتەر تاپسىرىلادى. ال كەلەسى جىلى جەتكىلىكتى قاراجات قاراستىرىلعان جاعدايدا اۋدانى 550 مىڭ شارشى مەتر بولاتىن 7 مىڭعا جۋىق پاتەر سالۋدى كوزدەپ وتىرمىز»، - دەدى قالا باسشىسى.

اۆتور: مارلان جيەمباي