دەپۋتاتتار قۇتقارۋشىلاردىڭ زەينەت جاسىن تومەندەتۋدى ۇسىندى
فراكسيا مەملەكەت باسشىسى قاسىم-جومارت توقايەۆتىڭ جولداۋدا ازاماتتىق قورعانىس قىزمەتىنە ءمان بەرىپ، ونداعى قىزمەتكەرلەردىڭ جالاقىسىن كوتەرۋدى تاپسىرعانىن ەسكە سالدى جانە ءبىرقاتار ۇسىنىم جاسادى.
«بەلارۋس رەسپۋبليكاسىنىڭ مىسالىمەن مەملەكەتتىك ورتكە قارسى قىزمەتتىڭ قاتارداعى قىزمەتكەرلەرىنە قوسىمشا جۇمىس ىستەۋىنە زاڭدىق قۇقىق بەرۋ كەرەك. قازىرگى ۋاقىتتا قازاقستاندا بۇعان تىيىم سالىنعان. مەملەكەتتىك ورتكە قارسى قىزمەتكە قابىلداۋ مەرزىمىن التى ايدان ءۇش اپتاعا دەيىن قىسقارتقان ءجون. سونىمەن بىرگە، كوپپاتەرلى تۇرعىن ءۇي، ونەركاسىپتىك جانە الەۋمەتتىك نىساندار قۇرىلىسىندا جوبالىق-سمەتالىق قۇجاتتاما جاساۋعا ورتكە قارسى قىزمەت ماماندارىڭ قاتىسۋىن مىندەتتەۋ كەرەك»، - دەدى «حالىق كوممۋنيستەرى» فراكسياسىنىڭ مۇشەسى ماگەررام ماگەرراموۆ ءماجىلىستىڭ جالپى وتىرىسىندا.
سونىمەن بىرگە، دەپۋتات ورتكە قارسى قىزمەت عيماراتتارى مەن اۆتوپاركىن، قۇرال-جابدىقتارىن كەزەڭ- كەزەڭىمەن جاڭارتۋدى جانە قۇتقارۋشىلاردىڭ زەينەت جاسىن تومەندەتۋدى ۇسىندى.
«قۇتقارۋ قىزمەتىنىڭ زەينەتكە شىعۋ جاسىن پوليتسيا مەن مەملەكەتتىك قىزمەتشىلەر جاسىنا سايكەس تومەندەتۋ كەرەك. بۇگىندە قۇتقارۋشىلار 63 جاسقا دەيىن جۇمىس ىستەۋگە مىندەتتى. 60 جاستاعى سۋ قۇتقارۋشىسىن كوزگە ەلەستەتۋ قيىن. دەپۋتاتتىق ساۋالعا زاڭمەن بەلگىلەنگەن مەرزىمدە جاۋاپ جولداۋىڭىزدى سۇرايمىز»، - دەدى دەپۋتات.
