قاسىم-جومارت توقايەۆتىڭ قاتىسۋىمەن ازيا ەلدەرى قالامگەرلەرىنىڭ تۇڭعىش فورۋمى باستالدى

نۇر-سۇلتان. قازاقپارات -  ەلوردادا قازاقستان پرەزيدەنتى قاسىم-جومارت توقايەۆتىڭ قاتىسۋىمەن ازيا ەلدەرى قالامگەرلەرىنىڭ تۇڭعىش فورۋمى جۇمىسىن باستادى، دەپ حابارلايدى قازاقپارات ءتىلشىسى.

ازيا ەلدەرى قالامگەرلەرىنىڭ تۇڭعىش فورۋمى ازيا قۇرلىعىندا ورنالاسقان ەلدەر اراسىنداعى ادەبي-مادەني بايلانىستاردى نىعايتۋ، ودان ءارى دامىتۋ ءارى ەگەمەندى ەلىمىزدىڭ بۇگىنگى كەسكىن-كەلبەتىن، قازاقستاننىڭ ادەبيەتىن، رۋحاني قۇندىلىقتارىن پاش ەتۋ، ادەبي ۇدەرىستىڭ دامۋىنا قاتىستى ازيا ەلدەرىمەن تاجىريبە الماسۋ سىندى ماقسات-مىندەتتەردى كوزدەيدى. ادەبي فورۋمنىڭ جالپى وتىرىسىنا نوبەل سىيلىعىنىڭ نومينانتتارى وڭتۇستىك كورەيا قالامگەرى كو ىن، كاتارلىق موزا ال-مالكي، موڭعوليالىق گومبوجاۆىن مەند ووەو، وڭتۇستىك ازيا حالىقارالىق سىيلىعىنىڭ لاۋرەاتى ءۇندىستاندىق امار ميترا، ازەربايجان حالىق جازۋشىسى انار راسۋىل رزايەۆ بايانداما جاسايدى.

فورۋم جۇمىسى 3 كۇنگە سوزىلادى. بۇگىن شارانىڭ جالپى وتىرىسى ءوتىپ جاتىر. ەكى بولىمدە 11 سپيكەر بايانداما وقيدى. ەرتەڭ TED.9 فورماتىندا ارنايى شارا وتەدى. وندا 10 سپيكەر ءدارىس وقىپ، ەركىن فورماتتا سۇحباتتاسادى. سونداي-اق، اباي كوشەسىنىڭ بويىندا «قالامگەرلەر اللەياسى» اشىلادى. شارا اياسىندا ورتالىق ازيا قالامگەرلەرىنىڭ كەزدەسۋى وتەدى. وندا ۇلى جىبەك جولى بويىنداعى ادەبيەتتىڭ بولاشاعى تۋرالى ايتىلادى. فورۋم اياسىندا جاس ازيا قالامگەرلەرىنىڭ كەزدەسۋى دە جوسپارلانعان.

ق ر پرەزيدەنتى اكىمشىلىگى مەن ق ر مادەنيەت جانە سپورت مينيسترلىگىنىڭ قولداۋىمان وتەتىن شارا 4-6- قىركۇيەك كۇندەرىنە جوسپارلانعان. فورۋمعا سونىمەن قاتار بۋكەر جانە ASEAN سىيلىقتارىنىڭ لاۋرەاتتارى، جازۋشىلار وداقتارى مەن قاۋىمداستىقتارىنىڭ ءتوراعالارىنان قۇرالعان 90 قوناق كەلگەن.