قاسىم-جومارت توقايەۆ اسقار ماميندى قابىلدادى
قازاقستان پرەزيدەنتى قاسىم-جومارت توقايەۆ 2-قىركۇيەكتەگى قازاقستان حالقىنا جولداۋىن جۇزەگە اسىرۋ بويىنشا پرەمەر-مينيستر اسقار ماميننىڭ جالپى ۇلتتىق ءىس-قيمىل جوسپارىن ازىرلەۋ تۋرالى اقپاراتىن تىڭدادى. مەملەكەت باسشىسى ەلىمىز ساياسي جانە الەۋمەتتىك-ەكونوميكالىق رەفورمالاردىڭ جاڭا كەزەڭىنە اياق باسقانىن اتاپ ءوتتى. ونىڭ ايتۋىنشا، اتالعان ۋادەلەردى ورىنداۋ ورتالىق پەن وڭىرلەردە، ءبىرقاتار زاڭ جوبالارى مەن باسقا دا نورماتيۆتىك-قۇقىقتىق اكتىلەردى ازىرلەۋدى قوسا العاندا ماڭىزدى ءارى ۇيلەسىمدى جۇمىستى تالاپ ەتەدى.
«جولداۋدىڭ ۋاقىتىلى جانە ساپالى جۇزەگە اسىرىلۋى عانا ازاماتتاردىڭ ءومىر ءسۇرۋ دەڭگەيىن ارتتىرىپ، ەكونوميكانىڭ قۇرىلىمدىق جاڭعىرۋىن قامتاماسىز ەتەدى. جولداۋدا قويىلعان مىندەتتەر بەلگىلەنگەن مەرزىمدە مۇلتىكسىز ورىندالۋى ءتيىس. ۇكىمەت جالپى ۇلتتىق ءىس-قيمىل جوسپارىن ازىرلەۋ جونىندەگى جۇمىستى باستاعانى دۇرىس بولدى. ارقانى كەڭگە سالاتىن ۋاقىت جوق. بارلىق مينيسترلىكتەر مەن ۆەدومستۆولاردىڭ، اكىمدىكتەردىڭ باسشىلارى رەفورمالاردى ءتيىمدى جانە ۋاقتىلى جۇزەگە اسىرۋعا وزدەرى جاۋاپتى بولادى»، - دەدى قاسىم-جومارت توقايەۆ.
