مەملەكەت باسشىسى ۇلتتىق كەڭەستىڭ مۇشەلەرىمەن كەزدەستى

نۇر- سۇلتان. قازاقپارات -  كەشە قر پرەزيدەنتى قاسىم- جومارت توقايەۆ ۇلتتىق قوعامدىق سەنىم كەڭەسىنىڭ مۇشەلەرىمەن ءبىرقاتار كەزدەسۋلەر وتكىزدى، دەپ حابارلايدى قازاقپارات اقورداعا سىلتەمە جاساپ.

بەلگىلى قوعام قايراتكەرى، پۋبليتسيست سەيداحمەت قۇتتىقاداممەن اڭگىمەلەسۋ بارىسىندا قازاقستان رەسپۋبليكاسى پرەزيدەنتىنىڭ جانىنداعى ۇلتتىق قوعامدىق سەنىم كەڭەسى جۇمىسىنىڭ وزەكتى اسپەكتىلەرى، اتالعان ديالوگ الاڭىنىڭ ەلىمىزدىڭ الەۋمەتتىك- ساياسي ومىرىندەگى ءرولى تالقىلاندى. سونىمەن قاتار، كەزدەسۋدە قازىرگى ىشكى ساياسي احۋال جانە ورتالىق ازياداعى وڭىرلىك ۇدەرىستەر جونىندە ءسوز بولدى.

 قازاقستاننىڭ ازاماتتىق اليانسىنىڭ پرەزيدەنتى اسىلبەك قوجاحمەتوۆپەن وتكەن كەزدەسۋدە ازاماتتىق قوعامدى دامىتۋ، مەملەكەتتىك ورگاندار جانىنداعى قوعامدىق كەڭەستەردىڭ ءرولىن ارتتىرۋ ماسەلەلەرى تالقىلاندى. مەملەكەت باسشىسى ازاماتتىق سەكتوردى نىعايتۋدىڭ جانە ونىڭ الەۋەتىن ءارتۇرلى سالادا پايدالانۋدىڭ ماڭىزدىلىعىن اتاپ ءوتتى. سونىمەن قاتار، ءبىلىم جانە عىلىم سالاسىن جاڭعىرتۋ، ۋنيۆەرسيتەتتەردىڭ جاڭا ءرولى مەن ولاردىڭ مۇمكىندىكتەرىن ۇلتتىق ەكونوميكانى رەفورمالاۋ ىسىنە پايدالانۋ جونىندە ءسوز بولدى.

پرەزيدەنت «ساكرالدى قازاقستان» عىلىمي- زەرتتەۋ ورتالىعىنىڭ جەتەكشىسى بەرىك ابدىعاليمەن « ۇلىتاۋ-2019» حالىقارالىق تۋريستىك فورۋمىندا ۇسىنىلعان باستامالاردىڭ ىسكە اسىرىلۋ ماسەلەلەرىن تالقىلادى. سونىمەن قاتار، ەلىمىزدە ەتنوتۋريزمدى كەڭىنەن ناسيحاتتاۋ قاجەتتىگىنە ەرەكشە نازار اۋدارىلدى.