بىرىككەن ۇلتتار ۇيىمى ارالدى قۇتقارۋ قورىمەن ىنتىماقتاستىق قارارىنا قول قويدى

نۇر- سۇلتان. قازاقپارات - تۇرىكمەنستان مەملەكەتىنىڭ باستاماشىلىعىمەن بىرىككەن ۇلتتار ۇيىمى مەن حالىقارالىق ارالدى قۇتقارۋ قورى اراسىندا ىنتىماقتاستىق قارارى قابىلداندى، دەپ حابارلايدى قازاقپارات ءتىلشىسى.

قازاقستان رەسپۋبليكاسىنداعى تۇرىكمەنستان ەلشىلىگىنەن ءمالىم ەتكەندەي، ا ق ش- تىڭ نيۋ- يورك قالاسىنداعى بىرىككەن ۇلتتار ۇيىمىنىڭ شتاب- پاتەرىندە ۇيىمعا مۇشە- مەملەكەتتەردىڭ ۋاكىلەتتى وكىلدەرىنىڭ قاتىسۋىمەن ب ۇ ۇ باس اسسامبلەياسىنىڭ 73-سەسسياسىنىڭ 85- جالپى وتىرىسى ءوتتى.

«وتىرىس بارىسىندا «بىرىككەن ۇلتتار ۇيىمى مەن حالىقارالىق ارالدى قۇتقارۋ قورىنىڭ اراسىنداعى ىنتىماقتاستىق» رەزوليۋتسياسى ءبىر اۋىزدان قابىلداندى. اتالمىش رەزوليۋتسياعا تۇرىكمەنستان باستاماشى بولدى. ونىڭ بىرلەسكەن اۆتورى - 21 مەملەكەت بولىپ وتىر»، - دەلىنگەن حابارلامادا.

ارال تەڭىزىن ساقتاپ قالۋ ماسەلەسى جاھاندىق ماڭىزعا يە ەكەنىن العا تارتا وتىرىپ، تۇرىكمەنستان اتالمىش ەكولوگيالىق داعدارىستى شەشۋ ءۇشىن الەمدىك قاۋىمداستىقتار كۇش بىرىكتىرۋى كەرەكتىگىن كوتەردى. تۇرىكمەنستان حالىقارالىق ارالدى قۇتقارۋ قورىنداعى (ح ا ق ق) ءوز وكىلەتتىلىگى اياسىندا 2017-2019 -جىلدارى ارال تەڭىزىنىڭ باسسەينى ءۇشىن ب ۇ ۇ ارنايى باعدارلاماسىن ازىرلەگەن.

«قابىلدانعان رەزوليۋتسيانىڭ تارتىبىنە سايكەس، ايماقتىق ىنتىماقتاستىقتى كۇشەيتۋ ماقساتىندا قوردىڭ جۇمىسىن جەتىلدىرۋ قاجەتتىگىنە ماڭىز بەرىلدى. قابىلدانعان قاراردىڭ ماڭىزدى تارماقتارىنىڭ ءبىرى - ارال تەڭىزى باسسەينى ءۇشىن ب ۇ ۇ ارنايى باعدارلاماسىن ازىرلەۋ مۇمكىندىگى. سونىمەن بىرگە 2019 -جىلى ح ا ق ق اتقارۋشى كوميتەتى ارقىلى ب ۇ ۇ مەكەمەلەرى مەن مۇشە- مەملەكەتتەرى ءۇشىن ءتيىستى كەڭەس جۇرگىزۋ بولىپ وتىر»، - دەدى ەلشىلىكتەن.

قۇجاتتا ورتالىق ازياداعى تۇراقتى دامۋدى ىسكە اسىرۋ ماقساتىندا قورشاعان ورتانى قورعاۋ بويىنشا ايماقتىق باعدارلامانى ءتيىمدى تۇردە ازىرلەۋ جانە جۇزەگە اسىرۋ ماڭىزدىلىعى تۋرالى ەرەكشە ءسوز قوزعالعان.

رەزوليۋتسيا اياسىندا مامانداندىرىلعان مەكەمەلەر مەن وزگە دە ۇيىمدارعا، حالىقارالىق قارجى ۇيىمدارىنا ارالدى قۇتقارۋ حالىقارالىق ۇيىمىمەن ىنتىماقتاستىقتى دامىتا بەرۋ ۇسىنىلدى.

اۆتور: ايان بەكەن ۇلى