باقىتجان ساعىنتايەۆ كوپ پاتەرلى ۇيلەردە جەر سالىعىن الىپ تاستاۋدى ۇسىندى
بۇگىن ۇكىمەتتىڭ سەلەكتورلىق رەجىمدەگى وتىرىسىندا ق ر پرەمەر-ءمينيسترى باقىتجان ساعىنتايەۆ وسىنداي تاپسىرما جۇكتەدى، دەپ حابارلايدى قازاقپارات ءتىلشىسى.
باقىتجان ساعىنتايەۆ الدىمەن اقپارات جانە كوممۋنيكاتسيالار مينيسترلىگىنە مۇدەلى مەملەكەتتىك ورگاندارمەن بىرگە مەملەكەتتىك ورگانداردا قازىرگى بيزنەس پروتسەستەردى تۇبەگەيلى قايتا قاراۋ جونىندەگى شارالاردى ازىرلەۋدى تاپسىردى.
«ەڭ الدىمەن قاعازدان باس تارتىپ، 2020-جىلدان باستاپ تولىقتاي ەلەكتروندى قۇجات اينالىمىنا كوشۋ قاجەت. حالىققا جۇرگىزىلىپ جاتقان رەفورمالار تۋرالى ۇنەمى اقپارات بەرىپ، كەرى بايلانىستى قامتاماسىز ەتسىن»، - دەدى ول.
سونىمەن قاتار ۇكىمەت باسشىسى ۇلتتىق ەكونوميكا مينيسترلىگىنە كوپپاتەرلى تۇرعىن ۇيلەردەگى جەر سالىعىن الىپ تاستاۋ ماسەلەسىن پىسىقتاۋدى تاپسىردى.
«ۇلتتىق ەكونوميكا مينيسترلىگى قارجى مينيسترلىگىمەن بىرگە الەۋمەتتىك تولەمدەردى ەسەپتەۋ جانە ەڭبەكاقى تولەۋ قورىنان ءبىرىڭعاي تولەم تۇرىندە وڭايلاتۋ، جەكە تۇلعالار ءۇشىن جەر سالىعى مەن ونداعى قۇرىلىسقا سالىناتىن سالىقتى جىلجىمايتىن مۇلىككە سالىناتىن ءبىر سالىققا قوسۋ ماسەلەلەرىن پىسىقتاسىن. كوپپاتەرلى تۇرعىن ۇيلەردە جەر سالىعىن الىپ تاستاۋ ماسەلەسىن قاراسىن»، - دەدى باقىتجان ساعىنتايەۆ.