مۇعالىمدەرگە ۇستەماقى تولەۋدىڭ قارجى- ەكونوميكالىق ەسەبى دايىندالۋدا
بۇل جايىندا ءماجىلىس دەپۋتاتتارىنىڭ رەسمي ساۋالىنا قر پرەمەر- ءمينيسترى باقىتجان ساعىنتايەۆتىڭ بەرگەن جاۋابىندا ايتىلدى، دەپ حابارلايدى قازاقپارات ءتىلشىسى.
ۇكىمەت باسشىسىنىڭ ايتۋىنشا، مەملەكەتتىك ۇيىمداردىڭ قىزمەتشىلەرىنە، ونىڭ ىشىندە مەكتەپ مۇعالىمدەرىنە جالاقى تولەۋ مەملەكەتتىك بيۋدجەت ەسەبىنەن قارجىلاندىرىلاتىن ۇيىمداردىڭ ازاماتتىق قىزمەتكەرلەرىنە، جۇمىسشىلارىنا جالاقى تولەۋ جۇيەسىنە ساي جۇزەگە اسىرىلادى.
«2019 -جىلدىڭ ماۋسىمىندا قابىلدانۋى جوسپارلانىپ وتىرعان «پەداگوگتەر مارتەبەسى تۋرالى» زاڭ جوباسىندا قوسىمشا ىنتالاندىرۋشى ۇستەمەاقى، سونىمەن قاتار پەداگوگ كاسىبىنىڭ بەدەلىن جانە ونىڭ قوعامداعى مارتەبەسىن كوتەرۋ بويىنشا وزگە دە شارالار قاراستىرىلعان. قازىرگى ۋاقىتتا قوسىمشا ىنتالاندىرۋ ۇستەمەاقى بويىنشا قارجىلىق- ەكونوميكالىق ەسەپ پەن نەگىزدەمە دايىنداۋ بويىنشا جۇمىس جۇرگىزىلىپ جاتىر. ول رەسپۋبليكالىق بيۋدجەتتىك كوميسسيانىڭ قاراۋىنا ەنگىزىلەتىن بولادى» ، - دەدى باقىتجان ساعىنتايەۆ.
ايتا كەتەيىك، ءماجىلىس دەپۋتاتتارى رەسمي ساۋالدا مۇعالىمدەرگە داپتەر تەكسەرگەنى مەن سىنىپقا جەتەكشىلىك جاساعانى ءۇشىن تولەنەتىن ۇستەمەاقى كولەمى تىم تومەن ەكەندىگىن جازعان بولاتىن. ماسەلەن، سىنىپقا جەتەكشىلىك ءۇشىن مۇعالىمگە ايىنا 4 مىڭ تەڭگە قوسىلادى. بۇل رەتتە، مۇعالىمگە كۇدەلىك تەكسەرۋ، ءتۇرلى شارالار، سىنىپ ساعاتتارىن وتكىزۋ، اتا- انالار جينالىسىن وتكىزۋ سىندى كوپتەگەن مىندەتتەر جۇكتەلەدى.
