قىلمىستىق ىستەردىڭ ۇشتەن ءبىرى تاتۋلاسۋمەن اياقتالادى - جوعارعى سوت
«جابىرلەنۋشىمەن تاتۋلاسۋ شارالارىنا بايلانىستى سوتتاردىڭ قىلمىستىق ىستەردى توقتاتۋ دەڭگەيى تۇراقتى تۇردە ارتىپ كەلەدى. 2018 -جىلى 13897 ءىس توقتاتىلدى، بۇل كورسەتكىش بارلىق ىستەردىڭ 28,7 پايىزى. قىلمىستىق جاۋاپقا تارتىلعانداردىڭ ۇشتەن بىرىنە جۋىعى جازادان بوساتالىپ، جابىرلەنۋشىلەرگە كەلتىرىلگەن شىعىندار سوت بارىسىندا وتەپ بەرىلدى»، - دەدى ا. راحمەتۋلين سوت جۇيەسىنىڭ 2018 -جىلعى جۇمىسىنىڭ قورىتىندىسىنا ارنالعان ەل سۋديالارىنىڭ كەڭەيتىلگەن وتىرىسىندا.
ونىڭ ايتۋىنشا، 2017 -جىلمەن سالىستىرعاندا پروكۋرور قاتىسقان ىستەر بويىنشا اقتاۋ ۇكىمدەرى 2,3 ەسەگە (100-دەن 226-عا دەيىن) ارتقان. وتكەن جىلى جوعارعى سوتتىڭ كاسساتسيا القاسى ءبىر جىلدا جەكە ايىپتاۋلاردى قوسپاعاندا، 51 ادامدى اقتادى.
سۋديانىڭ اتاپ وتۋىنشە، 2017 -جىلعا قاراعاندا باس بوستاندىعىنان ايىرۋ جازاسىنا تارتىلعاندار ازايدى. 2018 -جىلى سوتتالعان بارلىق 7610 ادامنىڭ 23,9 پايىزى باس بوستاندىعىنان ايىرىلدى. بۇل كورسەتكىش 2017 -جىلى 28 پايىزدى (9405) قۇراعان ەدى.
تاراتىلعان مالىمەتتەرگە قاراعاندا، سوتتار باس بوستاندىعىنان ايىرۋمەن بايلانىستى ەمەس جازالاردى ءجيى قولدانا باستادى. ولاردىڭ اراسىندا ايىپپۇل، قوعامدىق جۇمىس، باس بوستاندىعىن شەكتەۋ سەكىلدى جازالاردىڭ ۇلەسى ارتتى.
سونىمەن قاتار، مۇلىكتى تاركىلەۋ 8 ەسەگە ازايدى، ياعني 10700-دەن 1318-گە دەيىن تومەندەدى.
اۆتور: رۋسلان عابباسوۆ
