قوستانايدا جول تالعامايتىن اۆتوكولىكتەر شىعارىلادى
باسقوسۋعا جەرگىلىكتى ج و و باسشىلارى، كوللەدج جانە مەكتەپ ديرەكتورلارى، ءبىلىم باسقارماسى مەن كاسىپوداق ۇيىمدارىنىڭ وكىلدەرى، سونداي-اق ستۋدەنتتەر مەن وقۋشىلار قاتىستى. باستى ماقسات - جىل ساناپ دامىپ كەلە جاتقان جەرگىلىكتى اۆتووندىرىسكە قاجەتتى مامانداردى دايارلاۋدىڭ وڭتايلى جولىن قالىپتاستىرۋ.
جيىنعا قاتىسۋشىلار كاسىپورىننىڭ ءوندىرىس سەحتارىن ارالاپ، وتاندىق ماشينانىڭ قالاي قۇراستىرىلاتىنىن ءوز كوزدەرىمەن كوردى. ودان كەيىن القا وتىرىسىندا باس قوسىپ، جەرگىلىكتى ءبىلىم وشاقتارىندا بولاشاق ماشينا قۇراستىرۋشى مامانداردى دايارلاۋ ماسەلەسىن، دۋالدى ءبىلىمدى دامىتۋ جولدارىن تالقىلادى.
«بيىل ءبىز JAC اۆتوكولىگىنىڭ جول تالعامايتىن S7، T6 پيكاپ ۇلگىلەرىن شىعارۋدى قولعا الامىز. ال 2019-2021-جىلدار ارالىعىندا JAC, ANKAI, HOWO, HANTENG اۆتوكولىكتەرى مەن اۆتوبۋستار قۇراستىرىلادى. وسىعان وراي، بيىل زاۋىتقا 250 ماماندى جۇمىسقا قابىلداۋدى كوزدەپ وتىرمىز»، - دەيدى «سارىارقا اۆتو ءوندىرىس» ج ش س ديرەكتورىنىڭ ورىنباسارى سەرگەي موگيلاتوۆ.
بىلتىر جەلتوقسان ايىندا «الليۋر» كومپانيالار توبى» ا ق مەن قىتايلىق «Genertec» كومپانياسى «سارىارقا اۆتو ءوندىرىس» سەرىكتەستىگىندە اۆتوونەركاسىپ الەۋەتىن ارتتىرىپ، اۆتوكولىك قۇراستىرۋ سالاسىنداعى قازاقستاندىق ۇلەستى %50 كە جەتكىزۋدى كوزدەيتىن ينۆەستيتسيالىق كەلىسىمكە وتىرعان بولاتىن. «Genertec» كومپانياسىنىڭ باسقارما ءتوراعاسى لۋ يمين وبلىس اكىمىمەن كەزدەسۋىندە قوستانايلىق اۆتو ونەركاسىپتى داۋىرلەۋ كەزەڭى كۇتىپ تۇرعانىن، بولاشاقتا وندىرىسكە جاڭا تەحنولوگيانىڭ ەڭ وزىق ۇلگىلەرى ەنگىزىلەتىنىن ايتقان ەدى.
فورۋم بارىسىندا ماشينا جاساۋ زاۋىتى مەن وبلىستىق ءبىلىم باسقارماسى جانە كاسىپوداق اراسىندا ءۇش تاراپتى مەموراندۋمعا قول قويىلدى.
بۇعان دەيىن حابارلاعانىمىزداي، قوستاناي وبلىسىنىڭ اكىمى قازاقستان پرەزيدەنتىنە اۆتوموبيل ءوندىرىسىن دامىتۋ، ينۆەستيتسيا تارتۋ جانە يندۋستريالىق جوبالاردى ىسكە اسىرۋ جۇمىستارىنىڭ ناتيجەلەرى تۋرالى ءمالىم ەتكەن بولاتىن.
