قازاقستاندا ستارتاپ-ەكوجۇيەسى قالاي دامۋدا
Tech Nation UK حالىقارالىق كونسالتينگ باسشىسى ستەفان كيۋستەردىڭ ايتۋىنشا، قازاقستاندىق ستارتاپ-ەكوجۇيەسى قارقىندى تۇردە دامىپ كەلەدى.
«قازىر الەمدە بارلىعى وتە قارقىندى تۇردە دامىپ كەلەدى، ءبىز سول ترەندتەردى جىلدام مەڭگەرۋىمىز كەرەك. جاس قازاقستاندىق ازىرلەۋشىلەرگە حالىقارالىق تاجىريبەلى جەتەكشىلەردىڭ كومەگى قاجەت. ولار بارلىق جوبالاردى يدەيادان باستاپ دايىن ستارتاپقا دەيىن وقىتىپ، دۇرىس باعىت بەرۋگە كومەكتەسەدى. وسى ورايدا، Astana Hub زاماناۋي تەحنولوگيالار مەن الەم بويىنشا دارىندى مامانداردى بىرىكتىرەتىن باستى ورتالىق بولىپ سانالادى. مەن بۇل فورۋم جاس IT- ماماندارى مەن ءىرى كومپانيالار، سونداي-اق ۇكىمەتتىڭ باسىن بىرىكتىرىپ، سيفرلىق جانە يننوۆاتسيالىق شەشىم شىعارۋعا ءوز سەپتىگىن تيگىزەتىندىگىنە سەنىمدىمىن»، - دەدى ستەفان كيۋستەر.
«Astana Hub» حالىقارالىق IT- ستارتاپتاردىڭ تەحنوپاركى» كەڭەسشىسى دجوزەف تسيگلەردىڭ ايتۋىنشا، قازاقستانعا كوپتەگەن تانىمال الەمدىك IT كومپانيالارمەن سەرىكتەستىك ورناتۋ قاجەت.
«وزگە دە كورپوراتسيالارمەن سەرىكتەستىك ورناتۋ جاڭا باستاپ جاتقان ستارتاپەرلەرگە دۇرىس باعىتتا دامۋعا كومەكتەسەدى. ول ءۇشىن ءبىز اقش- تىڭ كاليفورنيا شتاتىنداعى «سيليكوندى القاپتا» ورنالاسقان كومپانيالارمەن بايلانىس ورناتقانىمىز ءجون. بۇل فورۋم قازاقستاندىق ستارتاپ-ەكوجۇيەسىن دامىتىپ، وزگە دە شەتەلدىك ماماندارمەن تاجىريبە الماسۋعا كومەكتەسەدى دەپ ويلايمىن»، - دەدى دجوزەف تسيگلەر.
سونىمەن قاتار، سپيكەر كيبەرشابۋىل قاۋىپسىزدىگىنە اسا كوڭىل ءبولۋ كەرەكتىگىن ەسكەرە كەتتى.
«ول قازىرگى تاڭدا بارلىق دامىعان ەلدەردىڭ كۇرەسىپ جاتقان پروبلەماسى. بۇل جەردە كيبەرقاۋىپتەن ساقتاناتىن جەتىلدىرىلگەن تەحنولوگيالار قاجەت»، - دەدى ول.
ايتا كەتۋ كەرەك، 1- اقپان كۇنى الماتىدا ەۋرازيانىڭ يننوۆاتسيالىق ەكوجۇيەسىنە ارنالعان «جاھاندانۋ داۋىرىندەگى سيفرلىق كۇن ءتارتىبى 2.0» فورۋمى وتەدى. ە ا ە و ۇكىمەتى جالپى سيفرلاندىرۋ ماسەلەسىن تالقىعا سالادى. فورۋم ۇيىمداستىرۋشىسى - قازاقستان رەسپۋبليكاسىنىڭ اقپارات جانە كوممۋنيكاتسيالار مينيسترلىگى.
