ەلباسى شىعىس قازاقستان وبلىسىنىڭ اكىمىنە ءبىرقاتار تاپسىرما جۇكتەدى

بۇل تۋرالى اقوردانىڭ باسپا ءسوز قىزمەتىنەن ءمالىم ەتتى، دەپ حابارلايدى قازاقپارات.

كەزدەسۋدە مەملەكەت باسشىسىنا ءوڭىردىڭ الەۋمەتتىك-ەكونوميكالىق دامۋ بارىسى تۋرالى ەسەپ بەرىلدى.

نۇرسۇلتان نازاربايەۆ وبلىس تۇرعىندارىنىڭ ءال-اۋقاتىن ارتتىرۋدىڭ ماڭىزدىلىعىن اتاپ ءوتىپ، ايماقتاعى ءبىرقاتار ەكونوميكالىق كورسەتكىشتەردىڭ وڭ قارقىنمەن ءوسىپ كەلە جاتقانىن ايتتى.

قازاقستان پرەزيدەنتى «رۋحاني جاڭعىرۋ» جانە وبلىستىڭ تۋريستىك الەۋەتىن دامىتۋ باعدارلامالارىن ساپالى ىسكە اسىرۋ قاجەتتىگىنە باسا نازار اۋداردى.

«جالپى، ىشكى وڭىرلىك ءونىم كولەمى 104 پايىزعا ارتتى. ءوسىم دەڭگەيى ونەركاسىپ سالاسىندا 118 پايىزعا، اۋىل شارۋاشىلىعى بويىنشا 107 پايىزعا جەتتى. كوزدەگەن كورسەتكىشتەردىڭ بارىنە قول جەتكىزىپ كەلەمىز»، - دەدى شىعىس قازاقستان وبلىسىنىڭ اكىمى.

سونىمەن قاتار د. احمەتوۆ مەملەكەت باسشىسىنا وڭىردەگى دەنساۋلىق ساقتاۋ سالاسى بويىنشا حالىققا قىزمەت كورسەتۋ ساپاسىن ارتتىرۋ ءۇشىن قابىلدانىپ جاتقان شارالار تۋرالى مالىمدەدى.

«2015-جىلى ونكولوگيا، كارديولوگيا، انا مەن بالا، تراۆماتولوگيا سياقتى 4 باعىتتىڭ قاجەتتى قۇرال-جابدىقتارمەن قامتاماسىز ەتىلۋىن انىقتاۋ ماقساتىمەن دەنساۋلىق ساقتاۋ سالاسىنا تالداۋ جاسادىق. سونىمەن قاتار، دارىگەرلەر دايارلاۋدىڭ ءۇش دەڭگەيلى جۇيەسىن ازىرلەدىك. بۇل سەمەي قالاسىنداعى مەملەكەتتىك مەديتسينا ۋنيۆەرسيتەتىندە ءبىلىم بەرۋ، شەبەرلىك سىنىپتارىن وتكىزىپ، شەتەلدە وقىتۋ ءىسىن قامتيتىن بولادى. ءبىز وسى جۇمىستى ودان ءارى جالعاستىرا بەرەمىز»، - دەدى شىعىس قازاقستان وبلىسىنىڭ اكىمى.

د. احمەتوۆ ءبىلىم بەرۋ، اۋىز سۋمەن قامتۋ، جاڭا تۇرعىن ۇيلەر سالۋ جانە ەلدى مەكەندەردى اباتتاندىرۋ سالالارىندا اتقارىلىپ جاتقان جۇمىستار جونىندە ايتتى.

كەزدەسۋ سوڭىندا مەملەكەت باسشىسى ءبىرقاتار ناقتى تاپسىرما بەردى.