بانكتەرگە يپوتەكا بويىنشا سىياقى الۋعا تىيىم سالىنادى
استانا. قازاقپارات - 2019-جىلدىڭ 2- اقپانىنان باستاپ بانكتەرگە يپوتەكالىق زاەم تولەۋ مەرزىمى 180 كۇن ءوتىپ كەتكەننەن كەيىن ەسەپتەلىنگەن سىياقىنى الۋعا تىيىم سالىنادى، دەپ حابارلايدى قازاقپارات ءتىلشىسى ق ر ادىلەت مينيسترلىگىنە سىلتەمە جاساپ.
«بۇل تۇزەتۋ جەكە تۇلعانى (زاەمشىنى) سىياقى بويىنشا قارىزىنىڭ ءوسىپ كەتۋىنەن قورعاپ، بانكتەردىڭ بورىشكەرگە قاتىستى دەر ۋاقىتىندا شارا قابىلداۋ جاۋاپكەرشىلىگىن ارتتىراتىن بولادى»، - دەلىنگەن ادىلەت مينيسترلىگى تاراتقان اقپاراتتا.
ايتا كەتەيىك، 2019-جىلدىڭ 21- قاڭتارىندا قابىلدانعان «قازاقستان رەسپۋبليكاسىنىڭ كەيبىر زاڭنامالىق اكتىلەرىنە مەنشىك قۇقىعىن قورعاۋدى كۇشەيتۋ، تورەلىك، سوت جۇكتەمەسىن وڭتايلاندىرۋ جانە قىلمىستىق زاڭنامانىڭ ودان ءارى ىزگىلەندىرۋ ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى» زاڭ اياسىندا «قازاقستان رەسپۋبليكاسىنداعى بانكتەر جانە بانك قىزمەتتەرى تۋرالى» زاڭعا تۇزەتۋلەر ەنگىزىلىپ وتىر.