پاتەردى تىركەۋ كەزىندە الاياقتاردان ساقتانۋ ءۇشىن بلوكچەين ەنگىزۋ ۇسىنىلدى
استانا. قازاقپارات - ق ر پارلامەنتى ءماجىلىسى ءتوراعاسىنىڭ ورىنباسارى ۆلاديمير بوجكو جىلجىمايتىن مۇلىكتى تىركەۋ كەزىندە بلوكچەين تەحنولوگياسىن ەنگىزۋ ارقىلى الاياقتارمەن كۇرەسۋدى ۇسىندى، دەپ حابارلايدى قازاقپارات.
«تىركەۋ مالىمەتتەرىنىڭ بولماۋى نەمەسە مۇلىكتىڭ ۋاقتىلى تىركەلمەۋى مەنشىك قۇقىعىن جوعالتۋعا الىپ كەلەتىنى بەلگىلى. مۇلىكتى جالعان قۇجاتتارمەن تىركەۋ فاكتىلەرى بار. سوندىقتان بۇنداي ارەكەتتەرگە بلوكچەين تەحنولوگيالارىن ەنگىزۋ ەسەبىنەن توسقاۋىل قويۋعا بولار ەدى. الاياقتىقپەن كۇرەس ماقساتىندا بلوكچەين جۇيەسىن قولدانۋ شارالارى ءۇندىستاندا ەنگىزىلگەن. سونىمەن قاتار، ونى ۋكراينادا، شۆەتسيادا جانە باسقا دا ەلدەردە كەڭىنەن پايدالانۋ جوسپارلانىپ وتىر»، - دەدى ۆ. بوجكو جىلجىمايتىن مۇلىك ماسەلەسىنە ارنالعان ۇكىمەت ساعاتىندا.
بۇدان بۇرىن حابارلانعانداي، قر اقپارات جانە كوممۋنيكاتسيالار ءمينيسترى داۋرەن ابايەۆ بلوكچەين تەحنولوگيالارىن ەنگىزۋ ارقىلى مەملەكەتتىك ورگاندارداعى اشىقتىق دەڭگەيى ايتارلىقتاي وزگەرەتىنىن اتاپ وتكەن بولاتىن.