زياتكەرلىك مەكتەپ وقۋشىلارى كانادا مەن ا ق ش- تاعى قاتارلاستارىنان وزدى - ق ر پرەزيدەنتى

استانا. قازاقپارات - نازاربايەۆ زياتكەرلىك مەكتەپتەرىنىڭ وقۋشىلارى كانادا مەن ا ق ش- تاعى قاتارلاستارىن باسىپ وزدى.

بۇل تۋرالى «نازاربايەۆ زياتكەرلىك مەكتەپتەرى» دەربەس ءبىلىم بەرۋ ۇيىمىنىڭ 10 جىلدىعىنا ارنالعان فورۋمدا ەلباسى نۇرسۇلتان نازاربايەۆ ءمالىم ەتتى، دەپ حابارلايدى قازاقپارات ءتىلشىسى.

«وزدەرىڭىز بىلەسىزدەر، ەل وڭىرلەرىن ارالاعان كەزدە زياتكەرلىك مەكتەپتەرگە بارعاندى جاقسى كورەمىن. سوندا الىستاعى شالعاي اۋىلداردىڭ بالالارى، مۇمكىنشىلىگى از وتباسىلاردىڭ، اتا-انا قامقورلىعىنسىز قالعان جەتكىنشەكتەردىڭ وزدەرىنىڭ بىلىمىمەن وسى مەكتەپكە ءتۇسىپ جاتقانى قۋانتادى. بۇل جەردە ەشقانداي باسقا تاڭداۋ جوق، تەك قانا بىلىمگە ەكپىن قويىلادى. وسى وقۋ ورنىن تاڭداعاندار ۇزدىك ەكەنىن كورسەتە ءبىلۋى كەرەك»، - دەدى ەلباسى.

ەلباسى نازاربايەۆ زياتكەرلىك مەكتەپتەرىنىڭ وقۋشىلارى ماتەماتيكالىق ساۋاتتىلىق جاعىنان ۇزدىك ەلدەر قاتارىنا ەنگەنىن ەسكە سالدى.

«ولار سينگاپۋر، جاپونيا ەلدەرىندەگى ۇزدىك تانىلعان قاتارلاستارىنا باسەكەلەس بولا الادى. سونىمەن قاتار كانادا، فينليانديا جانە ا ق ش- تاعى وقۋشىلاردى باسىپ وزدى. بۇل ءوز كەزەگىندە الدىڭعى قاتارلى ادىستەمەلەر مەن وقىتۋ ءتارتىبىن، وقۋشىلاردى ىرىكتەۋدىڭ جۇيەسىن ەنگىزۋدىڭ ناتيجەسى»، - دەدى پرەزيدەنت.

مەملەكەت باسشىسى زياتكەرلىك مەكتەپتەردە ەلىمىزدىڭ بارلىق وڭىرلەرىنەن بالالار ءبىلىم الىپ جاتقانىن اتاپ ءوتتى. ولاردىڭ 3 مىڭنان استامى كوپبالالى جانە از قامتىلعان وتباسىلاردان، 2,5 مىڭى اۋىلدىق جەرلەر مەن شاعىن قالالاردان تارتىلعان وقۋشىلار.

«اتاپ ايتقاندا، بۇل الەۋمەتتىك ادىلدىكتىڭ ناقتى كورسەتكىشى. سايكەسىنشە، ءاربىر تالانتتى بالانىڭ ءوزىن كورسەتۋىنە مۇمكىندىك بەرىلگەن. تەك بىلىمىمەن ءادىل تۇردە وقۋعا تۇسە الادى»، - دەدى نۇرسۇلتان نازاربايەۆ.

ەسكە سالايىق، استانادا ەلباسىنىڭ قاتىسۋىمەن «نازاربايەۆ زياتكەرلىك مەكتەپتەرى» دەربەس ءبىلىم بەرۋ ۇيىمىنىڭ 10 جىلدىعىنا ارنالعان «ۇلى دالا مۇراگەرلەرى» اتتى وقۋشىلار مەن پەداگوگتاردىڭ فورۋمى ءوتىپ جاتىر.

زياتكەرلىك مەكتەپتەر قۇرۋ جونىندەگى جوبا 2008-جىلدىڭ ناۋرىز ايىنان جۇزەگە اسىرىلا باستادى. بۇگىندە ەلىمىزدە جاراتىلىستانۋ-ماتەماتيكا باعىتىنداعى 20 زياتكەرلىك مەكتەپ اشىلدى. 2010-2018-جىلدار ارالىعىندا وسى وقۋ ورىندارىن 8 مىڭعا جۋىق تۇلەك ءتامامدادى. 950 وقۋشى «التىن بەلگى» مەن ەرەكشە اتتەستاتقا يە بولدى.