ماجىلىستە ەلباسى تۋرالى كىتاپتىڭ تۇساۋى كەسىلدى
كىتاپتىڭ اۆتورى - ءماجىلىس دەپۋتاتى، «Qazaqstan ardagerleri» قاۋىمداستىعىنىڭ ءتوراعاسى، مەملەكەت جانە قوعام قايراتكەرى، جازۋشى، اقىن باقىتبەك سماعۇل.
ءىس-شارا «تۇڭعىش پرەزيدەنت كۇنى» جانە «تاۋەلسىزدىك كۇنى» مەملەكەتتىك مەرەكەلەرىنە وراي وتكىزىلىپ وتىر.
تۇساۋكەسەر راسىمىنە ءماجىلىس ءتوراعاسىنىڭ ورىنباسارى گۇلميرا يسيمبايەۆا، سەنات ءتوراعاسىنىڭ ورىنباسارى بەكتاس بەكنازاروۆ جانە قوس پالاتا دەپۋتاتتارى مەن زيالى قاۋىم وكىلدەرى، ۇكىمەتتىك ەمەس ۇيىمداردىڭ جەتەكشىلەرى قاتىستى.
ب. سماعۇلدىڭ كوركەم تىلمەن جازىلعان بۇل ەڭبەگى ءىرى 7 تاراۋدان تۇرادى. ءار تاراۋ ەلباسى- قازاقستاننىڭ تۇڭعىش پرەزيدەنتى نۇرسۇلتان ءابىش ۇلى نازاربايەۆ تۇلعاسىنىڭ جەتى قىرىنا ارنالعان. اتاپ ايتقاندا، «تاۋەلسىزدىك - ماڭگىلىك ءۇشىن كۇرەس كەڭىستىگى» تاراۋىندا ەلباسىنىڭ جاڭا قازاقستاندىق مەملەكەتتىلىكتىڭ نەگىزىن قالاۋشى رەتىندەگى تاريحي ءرولى اشىلادى.
كىتاپتىڭ اۆتورى اتاپ وتكەندەي، «ەلباسى شاپاعاتى» تاراۋىندا ن. نازاربايەۆپەن كەزدەسكەن 1984 -جىلدان بەرگى ەستەلىكتەرى، مەملەكەت باسشىسىنىڭ سوعىس ارداگەرلەرىنە قامقورلىعى تۋرالى باياندالادى.
«ەلباسى - جاڭا ۇلتتى قالىپتاستىرعان فەنومەن» اتتى تاراۋدا مەملەكەتقۇراۋشى قازاق ۇلتىنىڭ اينالاسىندا ۇيىسقان قازاقستان حالقىن - «بولاشاعى ءبىرتۇتاس ۇلتتى» ءتۇزۋ كەزەڭدەرى مەن سول جولداعى قيىنشىلىقتار ناقتى وقيعالار نەگىزىندە سارالانادى.
«استانا - جاڭعىرۋدىڭ ءرامىزى» تاراۋى ەلوردانى جاريالاۋ جانە تۇرعىزۋ كەزەڭىندە بولعان، ءبىراق بۇعان دەيىن ەل نازارىنان تاسادا قالىپ كەلگەن توسىن وقيعالار مەن تىڭ دەرەكتەرگە قۇرىلعان.
«ءومىر شىنايىلىعىن وزگەرتكەن ليدەر» تاراۋىندا ب. سماعۇل اسكەري ساراپشى رەتىندە قازاقستان پرەزيدەنتىنىڭ دۇنيەجۇزىندەگى ءارتۇرلى قاقتىعىس وشاقتارىنىڭ ءوشىپ، تۇرعىندارىنىڭ بەيبىت ومىرگە ورالۋىنا ىقپال ەتكەن بىتىمگەر بەينەسىن سوزبەن سومدايدى.
«ازشىلىق ۇلتتى الىپقا اينالدىرعان» تاراۋىندا حالقىنىڭ سانى از بولعانىمەن، الەمدىك كوشباسشى مەملەكەتكە اينالعان دامىعان ەلدەر تاجىريبەسى ساراپتالادى. سونداي-اق «ۇلت اتاسى» اتانعان تاريحي ليدەرلەر قاتارىندا سانالاتىن ن. نازاربايەۆتىڭ قازاقستاندى وزىق «وتىزدىق» قاتارىنا قوسۋ ستراتەگياسىنىڭ ءمان-ماڭىزى عىلىمي تالدانادى.
«پرەزيدەنتكە باعىنۋ - جاعىنۋ ەمەس، ساياساتىن قولداۋ - تابىنۋ ەمەس» قورىتىندى تاراۋىندا تۇڭعىش پرەزيدەنتتىڭ «رۋحاني جاڭعىرۋ» باعدارلاماسىنا جانە سودان ءوربيتىن ماسەلەلەرگە ءمان بەرىلەدى. باقىتبەك سماعۇل ءوزىنىڭ ۇزاق جىلدارداعى وي-تولعانىسىنىڭ جەمىسى بولىپ تابىلاتىن بۇل ەڭبەگىندە ەلباسى اتىمەن ۇشتاسقان «ەلدىكتىڭ التىن عاسىرىنا» قاتىستى بەتبۇرىستاردىڭ تەك كۋاگەرى عانا ەمەس، تىكەلەي قاتىسۋشىسى رەتىندە ءداۋىر رۋحىن، قازىرگى زامان بەينەسىن عىلىمي نەگىزدە، ءبىراق وي مەن ءتىل ورنەگىن توگە وتىرىپ، اسا قىزىقتى سۋرەتتەيدى.
كىتاپ قالىڭ وقىرمانعا، ءار سالا ماماندارىنا، سونداي-اق بولاشاق «نازاربايەۆتانۋشىلارعا» ورنىقتى وي، دايەكتى دەرەك، تاعىلىمدى ءتۇيىن، ۇلاعاتتى ۇيعارىم ۇسىنادى.