ۇكىمەت باسشىسى قانداي اۋىلعا كەڭجولاقتى ينتەرنەت تارتىلاتىندىعىن ايتتى

استانا. قازاقپارات - قازاقستاننىڭ ءاربىر اۋىلىنا كەڭجولاقتى ينتەرنەت تارتۋعا قاراجاتىمىز جەتپەيدى.

بۇل تۋرالى بۇگىن «Digital Bridge» حالىقارالىق يننوۆاتسيالىق فورۋمدا ق ر پرەمەر-ءمينيسترى باقىتجان ساعىنتايەۆ ايتتى، دەپ حابارلايدى قازاقپارات ءتىلشىسى.

«بىزدە دە ۇلكەن پروبلەما بار. اۋماعىمىز وتە ۇلكەن، جەر كولەمى بويىنشا الەمدە 9- ەلمىز. حالىق سانى وتە از، شاشىراڭقى قونىستانعان. قازاقستاندا 7 مىڭداي ەلدى مەكەن بار. ەگەر ءبىز ولاردىڭ ءارقايسىسىنا كەڭجولاقتى ينتەرنەت جەتكىزەتىن بولساق، وندا وعان اقشامىز جەتپەيتىن ەدى. سوڭعى اۋىلعا جەتكىزگەنىمىزشە تەحنولوگيا دا وزگەرىپ كەتۋى مۇمكىن. قاجەتى دە بولماي قالۋى ىقتيمال»، - دەدى ق ر ۇكىمەت باسشىسى.

وسى ورايدا پرەمەر-مينيستر اۋىلدارعا ينتەرنەت جەتكىزۋدىڭ وزگە جولىن تاڭداعانىن باسا ايتتى.

«ءبىز تىرەك اۋىلداردى دامىتاتىن بولامىز. بىزدە ولاردىڭ سانى مىڭنان اسىپ جىعىلادى. ولار ەڭ ءبىرىنشى كەزەكتە دامىتىلىپ، ەڭ الدىمەن كەڭجولاقتى ينتەرنەتكە قول جەتكىزەتىن بولادى. جۇمىستى باستاپ تا كەتتىك، 2021-جىلى اياقتايمىز. ءبىزدىڭ وسىنداي اۋقىمدى مىندەتىمىز بار، ونى جىلدام شەشۋىمىز قاجەت»، - دەدى باقىتجان ساعىنتايەۆ.

ايتا كەتەيىك، فورۋمنىڭ سيفرلىق ەكونوميكانى دامىتۋدىڭ جاھاندىق ترەندتەرى تالقىلانعان جالپى وتىرىسىنا قاتىسقان پرەمەر-مينيستر «Digital Bridge» ۇلكەن بايلانىستار جاسالاتىن الاڭعا اينالاتىندىعىن قازاقستان تەك قانا سيفرلىق كۇن تارتىپپەن ءومىر ءسۇرىپ جاتقانىن ايتقان ەدى.

Digital Bridge - قازاقستانداعى بيىلعى جىلى ءوتىپ وتىرعان باستى يننوۆاتسيالىق وقيعا.