قازاقستان ا ق ش- تىڭ ساۋدا ميسسياسىمەن ىنتىماقتاستىقتى كەڭەيتەدى - مامين
ايتا كەتەرلىگى، بۇل ا ق ش- تىڭ قازاقستانداعى العاشقى ساۋدا ميسسياسى. فورۋم جۇمىسىنا ا ق ش ساۋدا ءمينيسترى ۋيلبۋر روسس پەن قر پرەمەر- ءمينيسترىنىڭ ءبىرىنشى ورىنباسارى اسقار مامين قاتىستى.
«ا ق ش - ۇزدىك ينۆەستورلاردىڭ ءبىرى سانالادى جانە ەلىمىزگە 40 ميلليارد دوللاردان استام قارجى قۇيدى. Chevron, Exxon Mobil, General Electric سىندى كومپانيالار ءبىزدىڭ ينجەنەريا، ەنەرگەتيكا سالالارىمىزدا جۇمىس ىستەپ جاتىر»، - دەدى فورۋم جۇمىسىن اشقان اسقار مامين.
سونىمەن قاتار ول اعىمداعى جىلى قازاقستان ا ق ش- تىڭ ساۋدا ميسسياسىمەن ىنتىماقتاستىقتى كەڭەيتە تۇسەتىندىگىن ايتتى.
«قازاقستان پرەزيدەنتى نۇرسۇلتان نازاربايەۆتىڭ قاڭتارداعى ا ق ش- قا تابىستى ساپارى ىنتىماقتاستىعىمىزدى كەڭەيتۋدىڭ جاڭا مەجەسىن بەلگىلەپ بەردى. ناتيجەسىندە قۇنى 7 ميلليارد ا ق ش دوللارىن قۇرايتىن كەلىسىمدەرگە قول قويدىق. مامىلەلەر ونەركاسىپ، قارجى، اۆياتسيا، تسيفرلاندىرۋ، مۇناي حيمياسى ونەركاسىبى سىندى ءتۇرلى سالالاردى قامتيدى. ءبىز جاڭا دوستار مەن سەرىكتەستەر تاپتىق»، - دەدى ق ر پرەمەر-ءمينيسترىنىڭ ءبىرىنشى ورىنباسارى.
اسقار مامين قازاقستان مەن ا ق ش پرەزيدەنتتەرى قابىلدانعان ستراتەگيالىق سەرىكتەستىكتى كەڭەيتۋ جونىندەگى بىرلەسكەن مالىمدەمە ەكى ەلدىڭ ەكونوميكالارى اراسىنداعى ساۋدا جانە ينۆەستيتسيانى ودان ارى كەڭەيتۋ ءۇشىن نەگىز بولدى.
«ءبىز ىنتىماقتاستىقتى كەڭەيتۋ قارىم-قاتىناسىمىزدى سەرىكتەستىك، اشىقتىق جانە سەنىم رۋحىندا دامىتۋعا الىپ كەلەرىنە سەنىمدىمىز. قازاقستانعا سالىنعان تىكەلەي شەتەل ينۆەستيتسياسىنىڭ 8 پايىزى امەريكاعا تيەسىلى. سونىڭ ارقاسىندا ەكونوميكامىزدىڭ ءوسىپ كەلە جاتقانىن كورىپ وتىرمىز. 2018-جىلدىڭ قىركۇيەگىندە جالپى ىشكى ءونىمىمىز 4 پايىزعا ءوستى جانە ول ۇزاق مەرزىمدى كەزەڭدە ءوسىمىن جالعاستىراتىن بولادى»، - دەدى ول.
ايتا كەتەيىك، فورۋم جۇمىسىندا 20 دان استام امەريكالىق كومپانيانىڭ باسشىسى، قازاقستاندىق بيزنەس وكىلدەرى، مينيسترلىكتەر مەن ۆەدومستۆولاردىڭ باسشىلارى قاتىسۋدا.
ايتا كەتەيىك، 2018-جىلدىڭ قاڭتار ايىندا ەلباسى نۇرسۇلتان نازاربايەۆ ا ق ش- قا رەسمي ساپارمەن بارعان بولاتىن.
