قازاقستان مەن قىرعىزستاننىڭ شەكارا سىزىعى حالىقارالىق قۇقىقتىق دەڭگەيدە بەكىتىلدى

استانا. قازاقپارات - پارلامەنت سەناتىنىڭ جالپى وتىرىسىندا «قازاقستان رەسپۋبليكاسى مەن قىرعىز رەسپۋبليكاسى اراسىنداعى قازاقستان-قىرعىز مەملەكەتتىك شەكاراسىن شەگەندەۋ تۋرالى شارتتى راتيفيكاتسيالاۋ» تۋرالى زاڭ جوباسى قارالدى، دەپ حابارلايدى قازاقپارات.

ەكى ەل اراسىنداعى شەكارانى شەگەندەۋ تۋرالى شارتقا 2017-جىلعى 25- جەلتوقساندا استانادا قىرعىز رەسپۋبليكاسى مەملەكەتى باسشىسىنىڭ قازاقستانعا رەسمي ساپارى اياسىندا قازاقستان پرەزيدەنتى نۇرسۇلتان نازاربايەۆ جانە قىرعىز پرەزيدەنتى سوورونباي جەەنبەكوۆ قول قويدى.

شارتتىڭ باستى ماقساتى - قازاقستان مەن قىرعىزستان اراسىنداعى شەكارا سىزىعىن حالىقارالىق قۇقىقتىق دەڭگەيدە بەكىتۋ. شەكارانى شەگەندەۋ ناتيجەسىندە مەملەكەتتىك شەكارا سىزىعىنىڭ ۇزىندىعى 1257,07 شاقىرىمدى قۇرادى. شەكارا سىزىعىندا 1055 شەكارالىق باعانا ورناتىلدى. ياعني، 533 ءىن قازاقستان تاراپى، 522 ءسىن قىرعىزستان جاعى قويدى.

«شارت مەرزىمسىز بولىپ تابىلادى ءارى دەنونساتسيالاۋعا جاتپايدى. ال شارتتىڭ كۇشىنە ەنۋى قازاقستاننىڭ مەملەكەتتىك شەكاراسىنىڭ حالىقارالىق قۇقىقتىق راسىمدەۋ پروتسەسىن اياقتايدى، قىرعىزستانمەن ارادا اۋماقتىق داۋدى بولدىرمايدى»، - دەدى ق ر سىرتقى ىستەر ءمينيسترى قايرات ءابدىراحمانوۆ.

ونىڭ سوزىنە قاراعاندا، قازاقستاننىڭ سىرتقى ساياساتىنىڭ نەگىزگى باعىتتارىنىڭ ءبىرى - ەلىمىزدىڭ ۇلتتىق قاۋىپسىزدىگىن قامتاماسىز ەتۋگە مۇمكىندىك بەرەتىن مەملەكەتتىك شەكارانى حالىقارالىق قۇقىقتىق راسىمدەۋ.