قاراعاندى- بالقاش جول ۋچاسكەسىندە قۇرىلىس جۇمىستارى باستالادى - جەڭىس قاسىمبەك

استانا. قازاقپارات - بۇگىن ماجىلىستەگى ۇكىمەت ساعاتىندا ق ر ينۆەستيتسيالار جانە دامۋ ءمينيسترى جەڭىس قاسىمبەك ەلىمىزدەگى نەگىزگى جولداردىڭ قۇرىلىسى تۋرالى باياندادى، دەپ حابارلايدى قازاقپارات.

«ساۋلەلىك پرينتسيپ بويىنشا ورتالىق- وڭتۇستىك، ورتالىق- شىعىس جانە ورتالىق- باتىس دالىزدەرىنىڭ رەكونسترۋكسياسى جۇرگىزىلۋدە. رەكونسترۋكسيالاۋ جۇمىستارى 2013 -جىلى باستالعان ورتالىق- وڭتۇستىك ءدالىزىنىڭ ۇزاقتىعى 1291 شاقىرىمدى قۇرايدى. ءدالىز تولىعىمەن ءبىرىنشى تەحنيكالىق كاتەگورياعا اۋىستىرىلادى. 2013-2017 -جىلدار ارالىعىندا استانا- تەمىرتاۋ (171 شاقىرىم) جانە الماتى- قاپشاعاي (104 شاقىرىم) ۋچاسكەلەرىندە قوزعالىس اشىلدى. بيىل تەمىرتاۋ- قاراعاندى (14 شاقىرىم) ۋچاسكەسىندەگى قوزعالىستى اشامىز. قاراعاندى قالاسىنىڭ اينالما جولىندا (48 شاقىرىم) جانە قۇرتى- بۋرىلبايتال (228 شاقىرىم) ۋچاسكەسىندە جۇمىستار جۇرگىزىلە باستادى. سونىمەن قاتار، بيىل قازان ايىندا باتىس ەۋروپا - باتىس قىتاي جوباسىنىڭ اعىمداعى زايمدارىن ۇنەمدەۋ ەسەبىنەن بالقاش- بۋرىلبايتال (297 شاقىرىم) ۋچاسكەسىنىڭ رەكونسترۋكتسياسىن باستاۋعا كەلىسىمشارت جاساۋ جوسپارلانۋدا»، - دەپ توقتالدى مينيستر.

 وسى ورايدا ج. قاسىمبەك زايم جونىندەگى كەلىسىمدى تەز ارادا راتيفيكاتسيالاۋ بويىنشا دەپۋتاتتاردان كومەك سۇرادى.

«2019 -جىلدان باستاپ مەملەكەتتىك كەپىلدىك زايمدارى ەسەبىنەن قاراعاندى- بالقاش (363 شاقىرىم) جانە قۇرتى- قاپشاعاي (67 شاقىرىم) ۋچاسكەلەرىنىڭ رەكونسترۋكتسياسىن باستاۋ جوسپارلانۋدا. جالپى، جوبا 2020-2021 -جىلى اياقتالادى دەپ بولجاپ وتىرمىز. ۇزاقتىعى 904 شاقىرىم بولاتىن ورتالىق- شىعىس ءدالىزىنىڭ رەكونسترۋكتسياسى تولىق قارقىندا جۇرگىزىلۋدە. بۇگىنگى كۇنى استانا- پاۆلودار (200 شاقىرىم) جانە پاۆلودار- سەمەي- قالباتاۋ (204 شاقىرىم) ۋچاسكەلەرىندە قوزعالىس اشىق. بيىل 500 شاقىرىمدا جۇمىستار جۇرگىزىلۋدە، ونىڭ ىشىندە 239 شاقىرىم جولدى وسى جىلى، قالعان 261 شاقىرىمدى 2019 -جىلى اياقتايمىز. وسىلايشا، بيىل استانادان پاۆلودارعا دەيىنگى، ال 2019 -جىلى قالباتاۋعا دەيىنگى قوزعالىستى تولىق اشامىز»، - دەدى ۆەدومستۆو باسشىسى.

 ايتا كەتەيىك، «نۇرلى جول» مەملەكەتتىك باعدارلاماسى اياسىندا 2015-2017 -جىلدارى حالىقارالىق جانە رەسپۋبليكالىق ماڭىزى بار اۆتوجولداردىڭ قۇرىلىسى مەن رەكونسترۋكتسياسىنا 932 ميلليارد 4 ميلليون تەڭگە ءبولىندى (ونىڭ ىشىندە ۇلتتىق قوردان 472,8 ميلليارد تەڭگە).

بولىنگەن قارجى ەلىمىزدىڭ بارلىق ايماقتارىندا 5,6 مىڭ شاقىرىمنان استام جولعا قۇرىلىس جۇمىستارىن جۇرگىزۋگە مۇمكىندىك بەردى.3 جىلدىڭ قورىتىندىسى بويىنشا 1,8 مىڭ شاقىرىم جولدا قوزعالىس اشىلدى. بارلىق جوبالارعا 80 مىڭعا جۋىق ادام تارتىلدى. وتاندىق وندىرۋشىلەر ماتەريالدارىنىڭ ۇلەسى 95 پايىزدان اسادى.

اۆتور: رۋسلان عابباسوۆ