قازاقستان مەن قىتاي ساۋدا-ساتتىقتى دوللارسىز جۇرگىزۋدى كوزدەيدى

استانا. قازاقپارات - تاراپتار ەكى جاقتى وپەراتسيالاردى ۇلتتىق ۆاليۋتالارمەن جۇرگىزۋ ماسەلەسىن قاراستىرىپ جاتىر، دەپ حابارلايدى قازاقپارات ءتىلشىسى.

قىتاي حالىق رەسپۋبليكاسىنىڭ كوممەرتسيا جونىندەگى ۆيتسە-ءمينيسترى جەن حۋنبيننىڭ ايتۋىنشا، «ءبىر بەلدەۋ - ءبىر جول» باستاماسى اياسىندا قازاقستان ارقىلى ەۋروپاعا جەتكىزىلەتىن جۇكتەردىڭ كولەمى ايتارلىقتاي ءوستى. وسى ۋاقىتقا دەيىن ينفراقۇرىلىم، كادرلىق رەسۋرستار، ەلەكتروندى ساۋدا جانە تاعى باسقا سالالار بويىنشا ءبىرقاتار قۇجاتتارعا قول قويىلدى.

«قازىرگى كەزدە ءبىز ينۆەستيالاردى قورعاۋ تۋرالى جاڭا كەلىسىم بويىنشا كەلىسسوزدەردى باستادىق. بەس جىلدىڭ ىشىندە ءوزارا ساۋدا اينالىمى ءوستى. قىتايدىڭ جوعارى تەحنولوگيالىق تاۋارلارى قازاقستان نارىعىنا شىقتى. ال قازاقستان استىق يمپورتتاۋشىلاردىڭ تورتتىگىنە ەندى. وتكەن جىلى العاش رەت قازاقستاننىڭ تابيعي گازى قىتايعا ەكسپورتتالدى. ءبىز ەنەرگەتيكا، پايدالى قازبالار، حيميا ونەركاسىبى جانە تاعى باسقا سالالاردا ءىرى جوبالاردى قولعا الدىق. قازاقستان ءۇشىن قىتاي كوممەرتسيالىق كرەديتتەردىڭ باستى ارناسىنا اينالدى. تاراپتار ەكىجاقتى وپەراتسيالاردى ۇلتتىق ۆاليۋتالارمەن جۇرگىزۋدى قاراستىرىپ جاتىر»، - دەدى استاناداعى بيزنەس فورۋمدا جەن حۋنبين.

ونىڭ ايتۋىنشا، بۇگىندە قىتايدىڭ قارجى ۇيىمدارى «استانا» حالىقارالىق قارجى ورتالىعىنىڭ ۇلەسىنە كىردى. ولاردىڭ ينۆەستيتسيالارى 29 ميلليارد دوللاردى قۇراپ وتىر.

ايتا كەتەيىك، استاناداعى «ريكسوس» قوناق ۇيىندە قازاق- قىتاي بيزنەس فورۋمى باستالدى. اتالعان شارا «ءبىر بەلدەۋ - ءبىر جول» باستاماسىنىڭ بەس جىلدىعىنا ارنالىپ وتىر. بۇگىندە ق ح ر وسى باستامانىڭ بويىندا ورنالاسقان 25 مەملەكەتپەن تىعىز قارىم-قاتىناس ورناتىپ، ءوزارا ساۋدا-ساتتىقتى 605 ميلليارد دوللارعا جەتكىزدى. سونىڭ ىشىندە قازاقستان مەن قىتاي اراسىنداعى ساۋدا اينالىمى 10 ميلليارد دوللاردى قۇرايدى.

ق ر پرەزيدەنتى نۇرسۇلتان نازاربايەۆ بۇگىنگى فورۋم قاتىسۋشىلارىنا ءوز قۇتتىقتاۋىن جولدادى. قىتاي حالىق رەسپۋبليكاسىنىڭ ءتوراعاسى شي جينپيڭ دا ۇندەۋ جولداپ، قازاقستاننىڭ پرەزيدەنتى نۇرسۇلتان نازاربايەۆقا ءوز ريزاشىلىعىن ءبىلدىردى.