18:41, 06 - قىركۇيەك 2018 | GMT +5
نۇرسۇلتان نازاربايەۆ قاراعاندى وبلىسىنداعى ينۆەستيتسيالىق جوبالارمەن تانىستى
قاراعاندى. قازاقپارات - قازاقستان رەسپۋبليكاسىنىڭ پرەزيدەنتى نۇرسۇلتان نازاربايەۆ «Maker» جاۋاپكەرشىلىگى شەكتەۋلى سەرىكتەستىگىنىڭ قاراعاندى قۇيۋ- ماشينا جاساۋ زاۋىتىنا باردى، دەپ حابارلايدى قازاقپارات اقوردانىڭ باسپا ءسوز قىزمەتىنە سىلتەمە جاساپ.
قازاقستان پرەزيدەنتى روبوتتاندىرىلعان زاماناۋي قۇرىلعىلارمەن جانە اۆتوماتتاندىرىلعان باسقارۋ جۇيەسىمەن جابدىقتالعان جاڭا ماشينا جاساۋ زاۋىتىنىڭ وندىرىستىك ۇدەرىسىمەن تانىستى.
نۇرسۇلتان نازاربايەۆقا وبلىستاعى ينۆەستيتسيالىق جوبالاردىڭ ىسكە اسىرىلۋ جوسپارى باياندالدى، سونداي- اق «قازاق مىس» كورپوراتسياسى» جاۋاپكەرشىلىگى شەكتەۋلى سەرىكتەستىگىنىڭ جۇمىستارى تانىستىرىلدى.
سونىمەن قاتار، ەلباسى كاسىپورىن ۇجىمىمەن جانە قاراعاندى مەملەكەتتىك تەحنيكالىق ۋنيۆەرسيتەتىنىڭ ستۋدەنتتەرىمەن اڭگىمەلەستى.
مەملەكەت باسشىسى ەكونوميكانى دامىتۋدىڭ زاماناۋي ۇردىسىنە ساي دۋالدى ءبىلىم بەرۋدىڭ جانە كادرلار دايارلاۋدىڭ ماڭىزدىلىعىن ايتتى.
سوڭىندا قازاقستان پرەزيدەنتى جاس ماماندارعا جۇمىستا زور تابىسقا جەتۋگە تىلەكتەستىك ءبىلدىردى.
