قازاقستاندا بالا تۋۋ كورسەتكىشى ارتىپ كەلەدى
« وتباسى كۇنى قارساڭىندا بۇگىنگى جيىندى ماڭىزدى كەزدەسۋ دەپ ويلايمىن. قازاقستاننىڭ الەۋمەتىك ساياساتىندا وتباسى ينستيتۋتى باسىم باعىتتاردىڭ ءبىرى. ەلباسىمىز اتاپ وتكەندەي، وتباسى - ەڭ ۇلكەن باقىت، بارلىق جاقسىلىق سودان باستالادى. وسى باعىتتا « قازاقستانداعى 2030-جىلعا دەيىنگى وتباسىلىق جانە گەندەرلىك ساياسات تۇجىرىمداماسى» قابىلداندى. بالالار قۇقىعى جونىندەگى ۋاكىل ينستيتۋتى قۇرىلدى. وتباسى كۇنى بەلگىلەندى. الداعى كۇندەرى «مەرەيلى وتباسى» ۇلتتىق كونكۋرسى وتكىزىلەتىن بولادى»، - دەدى مەملەكەتتىك حاتشى استانادا وتكەن «قازاقستاندىق قوعامدى جاڭعىرتۋ پروتسەسىندەگى وتباسىنىڭ ءرولى» اتتى دوڭگەلەك ۇستەلدە.
گۇلشارا ءابدىقالىقوۆا اتاپ وتكەندەي، تۇجىرىمدامادا نەگىزىنەن وتباسى ينستيتۋتىن بەكەمدەۋ، وتباسىلىق قۇندىلىقتاردى دارىپتەۋ، وسكەلەڭ ۇرپاقتى فيزيكالىق، ينتەللەكتۋالدىق جانە رۋحاني تۇرعىدان دامۋى قامتىلعانىن ايتتى.
«وتباسىم - وتانىم، بىرلىگىم دەپ بىلەتىن قازاقستاندىقتار ءۇشىن ونىڭ قۇندىلىقتارىنىڭ ورنى ۇلكەن. مىنە، سوندىقتان بۇكىل ايماقتاردا وتباسى ينستيتۋتىن دامىتۋ مەن بەكەمدەۋ بويىنشا جۇيەلى تۇردە جۇمىستار جۇرگىزىلىپ جاتىر. وتباسىلىق ساياساتتىڭ ماڭىزدى بولىكتەرىنىڭ ءبىرى - بالالى وتباسىلارعا الەۋمەتتىك كومەك بەرۋ بولىپ تابىلادى. وزدەرىڭىز بىلەتىندەي، 2003-جىلدان باستاپ بالا تۋعان دا ءبىر جولعى جاردەماقى بەرىلەدى. 2006-جىلدان باستاپ بارلىق وتباسىلارعا بالانىڭ 1 جاسىنا دەيىنگى كۇتىمى ءۇشىن مەملەكەت تاراپىنان اقى تولەنەدى. 2008-جىلدان باستاپ جۇمىس ىستەپ جۇرگەن ايەلدەر ءۇشىن جۇكتىلىگىنە، انا بولۋىنا بايلانىستى مىندەتتى الەۋمەتتىك ساقتاندىرۋ ەنگىزىلدى. ال سوڭعى 10 جىلدا بالالى وتباسىلاردى قولداۋعا باعىتتالعان بيۋجەتتىڭ قارجىلاندىرۋ شارالارى 5 ەسەگە كوبەيتىلدى»، - دەدى ول.
مەملەكەتتىك حاتشى اتاپ وتكەندەي، انا مەن بالانى قولداۋدىڭ ءتيىمدى شارالارى ءوزىنىڭ وڭ ستاتيستيكاسىن كورسەتىپ وتىر. وسىلايشا، 2018-جىلدىڭ العاشقى جارتى جىلدىعىندا قازاقستاندا 192658 بالا دۇنيە ەسىگىن اشقان.
«بۇل كورسەتكىش وتكەن جىلدىڭ سايكەس كەزەڭىمەن سالىستىرعاندا، 3409 بالاعا كوپ. سونداي-اق، ازاماتتاردىڭ دەنساۋلىعى، انا مەن بالانىڭ دەنساۋلىعىن ساقتاۋ باعىتىندا شارالار قابىلدانۋدا. وسىنىڭ ناتيجەسىندە، 2017-جىلى انا ءولىمى 1,5 پايىزعا، نارەستە ءولىمى 7 پايىزعا ازايدى. ايماقتاردا 60 ۇ ە ۇ- نىڭ قاتىسۋىمەن وتباسى قۇرۋدى جوسپارلاۋ، انا مەن بالانىڭ دەنساۋلىعى ساقتاۋ بويىنشا 112 الەۋمەتتىك جوبا ىسكە اسىرىلدى. بەس جاسقا دەيىنگى بالالارعا پاتروناجدىق پروفيلاكتيكالىق باقىلاۋ جۇرگىزىلىپ، بالا اسىراپ العان وتباسىلاردى قولداۋ ماقساتىندا 600 گە تارتا بالا دەنساۋلىعى كابينەتى اشىلدى. اكەلەردىڭ بالا تاربيەسىندەگى جاۋاپكەرشىلىگىن ارتتىرۋ ءۇشىن ۇلتتىق كوميستسيا «اكەلەر وداعى» ق ب ارقىلى بارىنشا اكەلەر قوزعالىسىن قولداپ كەلەدى. اتالعان وداق وسىعان دەيىن رەسپۋبليكادا ءبىرقاتار شارالاردى وتكىزدى»، - دەدى گ. ءابدىقالىقوۆا.
