قاسىم-جومارت توقايەۆ سەناتتىڭ جاڭا سەسسياداعى جۇمىستارى تۋرالى ايتتى
«ەلباسى پارلامەنتتىڭ جاڭا سەسسياسىن اشىپ، دەپۋتاتتىق كورپۋستىڭ الدىندا تۇرعان نەگىزگى باعىتتاردى ايقىنداپ بەردى. ءبىزدىڭ الدىمىزدا تۇرعان اينىماس مەجە ايقىن، ياعني ەلىمىزدى دامىعان مەملەكەتتەردىڭ قاتارىنا قوسۋ جولىندا ايانباي ەڭبەك ەتىپ، كەشەندى شارالاردىڭ ورىندالۋىن زاڭ تۇرعىسىنان قامتاماسىز ەتۋ. پرەزيدەنت جاريالاعان بەس الەۋمەتتىك باستامانى ساپالى تۇردە جۇزەگە اسىرۋدىڭ ماڭىزى ەرەكشە. ولاردىڭ ورىندالۋى ءبىزدىڭ ۇنەمى باقىلاۋىمىزدا بولۋى ءتيىس. ەلباسى اتاپ وتكەن تۇپكى ماقسات ەلىمىزدىڭ ءال-اۋقاتىن ودان ءارى جاقسارتىپ، ەل ەكونوميكاسىن دامىتا ءتۇسۋدى كوزدەيتىن جۇمىستاردى ورىنداۋدا دەپۋتاتتارعا زور جاۋاپكەرشىلىك جۇكتەيدى»، - دەپ توقتالدى ق. توقايەۆ سەناتتىڭ جالپى وتىرىسىندا.
وسى ورايدا، ول سەناتورلار وڭىرلەرگە بارىپ، حالىقتى تولعاندىرىپ وتىرعان ماسەلەلەردى زەردەلەپ قايتقانىن، بۇل ءوز كەزەگىندە الدا تۇرعان اۋقىمدى مىندەتتەردى ورىنداۋ باعىتىنداعى جۇمىستارعا اسا قاجەت ەكەنىن اتاپ ءوتتى. سەسسيا بارىسىندا ءوزىن-ءوزى جۇمىسپەن قامتىعانداردى الەۋمەتتىك قامسىزداندىرۋ جۇيەسىنە تارتىپ، تۇرعىن ءۇي قاتىناستارىن رەتتەۋگە، وتاندىق تۋريزمدى جاقسارتۋعا، كاسىپكەرلىكتى جانە اگروونەركاسىپ كەشەنىن ودان ءارى دامىتۋعا باعىتتالعان زاڭ جوبالارى بويىنشا اۋقىمدى جۇمىستار جۇرگىزىلەدى.
«مەملەكەت باسشىسى قۇقىق قورعاۋ جۇيەسىن رەفورمالاۋعا ايرىقشا كوڭىل ءبولىپ، بۇل سالادا ورىن الىپ وتىرعان كەمشىلىكتەردى اتاپ ءوتتى. ءبىز وسى سالانى رەتتەيتىن زاڭداردى جەتىلدىرۋ بويىنشا جۇمىستار جۇرگىزەتىن بولامىز. سونىمەن قاتار، قىلمىستىق زاڭنامانى ەكونوميكالىق قىزمەت سالاسىندا ارى قاراي ىزگىلەندىرۋدى كوزدەيتىن زاڭنامالىق تۇزەتۋلەردىڭ توپتاماسىن قاراستىرامىز. رۋحاني جاڭعىرۋ باعدارلاماسىن ىسكە اسىرۋ اياسىندا تاريحي جانە كيەلى نىسانداردى ءتيىمدى دامىتۋعا جانە قورعاۋعا باعىتتالعان زاڭ جوباسى دا سەناتتىڭ كۇن تارتىبىندە بولادى. پرەزيدەنتتىڭ تاپسىرماسىنا سايكەس، تاياۋ ۋاقىتتا پارلامەنت قاراۋىنا قايتا قۇرىلعان اكىمشىلىك ايماقتاردىڭ جۇمىسىن قامتاماسىز ەتۋگە باعىتتالعان زاڭ جوبالارى ەنگىزىلەدى. دەپۋتاتتىق كورپۋس ەلباسى ايقىنداعان ماڭىزدى مىندەتتەردى تابىستى ورىنداۋ جولىندا ۇكىمەتپەن بىرلەسە وتىرىپ، ناتيجەلى جۇمىس ىستەيدى دەپ سەنەمىن»، - دپ ءتۇيدى سەنات ءتوراعاسى.
