قازاقستاندا اۋعانستان جاستارىنا بولىنەتىن ءبىلىم گرانتى قىسقارادى - داريعا نازاربايەۆا

استانا. قازاقپارات - قازاقستان اۋعانستان جاستارىنا بولىنەتىن ءبىلىم گرانتتارىن قىسقارتادى، دەپ حابارلايدى قازاقپارات ءتىلشىسى.

بۇل تۋرالى ق ر پارلامەنتى سەناتىنىڭ دەپۋتاتى داريعا نازاربايەۆا استانادا ءوتىپ جاتقان «اۋعانستانداعى ايەلدەردىڭ قۇقىقتارى مەن مۇمكىندىكتەرىن كەڭەيتۋ» وڭىرلىك كونفەرەنسياسىندا مالىمدەدى.

«اۋعانستان جاستارىنا ارنالعان 5 جىلدىق ءبىلىم بەرۋ باعدارلاماسى اياسىندا مىڭنان استام اۋعان جاستارى قازاقستاندا وقىدى. جىل سايىن 100 ادام ەلىمىزدەگى جوعارى وقۋ ورىندارىنا ءتۇسىپ وتىردى. قازىر بۇل باعدارلاما ءوز مارەسىنە جەتتى جانە باعدارلامانى 30 اۋعانستاندىقتى وقىتۋعا دەيىن قىسقارتامىز»، - دەدى داريعا نازاربايەۆا جۋرناليستەرگە بەرگەن سۇحباتىندا.

سەناتوردىڭ ايتۋىنشا، بۇل ءبىلىم العىسى كەلەتىن اۋعان جاستارىنىڭ سانىنا ەش اسەر ەتپەۋى ءتيىس، سەبەبى ولار قازاقستاندا عانا ەمەس، وزبەكستان، جاپونيا، ەۋروپادا ءبىلىم الا الادى.

«بۇگىنگى كونفەرەنسيادا وزبەكستاندىق ارىپتەستەرىمىز ءوز ەلدەرىندە اۋعان جاستارىن وقىتىپ جاتقانىن ايتتى. جاپونيا دا ءبىلىم بەرۋ جوبالارىندا اۋعانستانعا ۇلكەن كومەك بەرىپ وتىر. ەۋروپالىق وداق ءبىلىم بەرۋ گرانتىنىڭ العاشقى كەزەڭىنە 2 ميلليون ەۋرو بولۋگە دايىن. ياعني بۇل جۇمىس جالعاسا بەرەدى»، - دەدى داريعا نازاربايەۆا.

 سونىمەن بىرگە، د. نازاربايەۆا اۋعانستان جاستارىنا بولىنەتىن ءبىلىم گرانتتارىنىڭ 50 پروتسەنتىن قىزدارعا ءبولۋدى ۇسىندى.

«بۇگىنگى شارانى ايەلدەرگە ارناپ وتىرعانىمىز تەگىن ەمەس. ايەل ومىرگە بالا اكەلەدى جانە وعان ەڭ العاشقى تاربيە بەرىپ، مىنەزى مەن مەنتاليتەتىن قالىپتاستىرادى. سوندىقتان، ايەل ءبىلىمدى بولۋى كەرەك. ءبىلىمدى ايەل بالاسىنا ءوز ماحابباتىن، جىلۋى مەن مەيىرىمىن بەرۋمەن بىرگە، دۇرىس دۇنيەتانىمىن قالىپتاستىرادى. ەرلەردىڭ ايەلدەرگە دەگەن قارىم- قاتىناسى دۇرىس قالىپتاسادى. ياعني، بارلىعى وتباسىنان باستالادى»، - دەدى سەناتور.

اۆتور: ايجان سەرىكجان قىزى