نۇرسۇلتان نازاربايەۆ: اۋعانستاندا تەزىرەك بەيبىتشىلىك ورناعانىن قالايمىز
مۇنداي فورماتتاعى كونفەرەنتسيا ورتالىق ازيا وڭىرىندە العاش رەت ۇيىمداستىرىلىپ وتىر. بۇعان دەيىن 2013-2018-جىلدارى اۋعانستانداعى ايەلدەر ماسەلەسى بويىنشا سيمپوزيۋمدار سەرياسى ۆاشينگتون، وسلو، كابۋل قالالارىندا جۇرگىزىلگەن بولاتىن.
شاراعا اۋعانستان، ارمەنيا، ازەربايجان، قىرعىزستان، تاجىكستان، تۇرىكمەنستان، وزبەكستان، ەۋروپالىق وداق، قىتاي، رەسەي، ءۇندىستان، ا ق ش مەملەكەتتەرىنەن جانە ب ۇ ۇ- دان جوعارى دەڭگەيدەگى دەلەگاتسيا وكىلدەرى كەلدى.
ءوز سوزىندە ق ر مەملەكەتتىك حاتشىسى، ق ر پرەزيدەنتى جانىنداعى وتباسى جانە ايەلدەر ءىسى جونىندەگى ۇلتتىق كوميسسياسىنىڭ ءتورايىمى گۇلشارا ءابدىقالىقوۆا ەلباسى نۇرسۇلتان نازاربايەۆتىڭ كونفەرەنتسيا قاتىسۋشىلارىنا ارنالعان قۇتتىقتاۋ حاتىن وقىپ بەردى.
«كونفەرەنتسياداعى كۇن ءتارتىبىنىڭ وزەكتىلىگى ايەلدەردىڭ زاماناۋي ومىردەگى ەرەكشە ءرولىن جانە كوپتەگەن ساياسي، الەۋمەتتىك ماسەلەلەردى شەشۋگە، شيەلەنىستەردى رەتتەۋگە، بەيبىتشىلىكتىڭ دامۋىنا قوسقان ولشەۋسىز ۇلەسىن ايشىقتاي تۇسەدى. تاۋەلسىزدىك العان ساتتەن بەرى قازاقستان گەندەرلىك ساياسات ماسەلەلەرىندە جوعارى الەمدىك ستاندارتتارعا قول جەتكىزۋ ءۇشىن جانە ەلدىڭ الەۋمەتتىك-ساياسي ومىرىندەگى ايەلدەردىڭ ءرولىن كۇشەيتۋ ءۇشىن جۇيەلى جۇمىس ىستەپ كەلەدى. قازاقستان گەندەرلىك تەڭدىك جونىندەگى بارلىق ىرگەلى حالىقارالىق قۇجاتتاردى راتيفيكاتسيالادى، ونىڭ قاعيدالارى ءبىزدىڭ ستراتەگيالىق جانە ساياسي قۇجاتتارىمىزدا دامي ءتۇستى»، - دەلىنگەن مەملەكەت باسشىسىنىڭ قۇتتىقتاۋ سوزىندە.
پرەزيدەنت قازاقستاننىڭ ب ۇ ۇ قاۋىپسىزدىك كەڭەسىنىڭ مۇشەسى رەتىندە تۇتاس الەمدىك قاۋىمداستىقتىڭ بەلسەندى قولداۋىمەن ورتالىق ازيا مەن اۋعانستانداعى قاۋىپسىزدىكتى قامتاماسىز ەتۋگە ەرەكشە كوڭىل ءبولىپ وتىرعانىن جەتكىزدى. بۇل پروتسەستە اۋعانستانداعى ايەلدەردىڭ قۇقىقتارى مەن مۇمكىندىكتەرىن كەڭەيتۋ ماڭىزدى.
اۋعان ۇكىمەتىنىڭ ەلدەگى ايەلدەردىڭ جاعدايىن جاقسارتۋ جانە گەندەرلىك تەڭدىكتى قامتاماسىز ەتۋدەگى قادامدارىن جوعارى باعالاي وتىرىپ، اۋعانستاندا اۋعان حالقىنا ارنالعان تۇجىرىمداما مەن حالىقتىڭ ءوز كۇش-جىگەرى ارقىلى تەزىرەك بەيبىتشىلىك ورناعانىن قالايمىز. مۇنداعى باستى اسپەكت ازاماتتىق سەكتوردىڭ، حالىقارالىق، وڭىرلىك جانە ۇلتتىق ۇكىمەتتىك ەمەس ۇيىمدار الەۋەتىن بەلسەندى پايدالانۋ بولىپ وتىر» - دەيدى نۇرسۇلتان نازاربايەۆ.
وسىعان بايلانىستى، پرەزيدەنتتىڭ ايتۋىنشا، بۇگىنگى كونفەرەنتسيالار سىندى حالىقارالىق الاڭدار الەۋەتى تۇتاس حالىقارالىق قاۋىمداستىقتىڭ كەڭ اۋقىمدى پىكىرىن ەسكەرە وتىرىپ، قازىرگى جانە كەلەشەكتەگى ەڭ ماڭىزدى ماسەلەلەردى تالقىلاۋعا مۇمكىندىك بەرەدى.
«بۇگىنگى كونفەرەنتسيا اۋعانستاندى ودان ءارى دامىتۋ جانە وڭالتۋعا، اۋعان ايەلدەرىنىڭ جاعدايىن جاقسارتۋعا جانە ەلدەگى ساياسي، ەكونوميكالىق، الەۋمەتتىك ماسەلەلەردى شەشۋ جولدارىن ىزدەستىرۋگە قوسىمشا سەرپىن بەرەتىنىنە سەنىمدىمىن. كونفەرەنتسيا قاتىسۋشىلارىنىڭ جوعارى ساپالى قۇرامى مەن وكىلەتتىلىگى بارلىق قاتىسۋشىلار ءۇشىن پايدالى پىكىر مەن تاجىريبە الماسۋعا مۇمكىندىك بەرەدى»، - دەيدى پرەزيدەنت.
