پرەمەر-مينيستر: حالىق ءالى دە ساپالى مەديتسينالىق كومەك الا الماي كەلەدى
«بىزدە دەنساۋلىق ساقتاۋ ۇيىمدارى جەلىسى دامىعان، ونى جاقسى بىلەسىزدەر. دەگەنمەن حالىق، اسىرەسە، اۋىلدىق جەرلەردە ءالى دە بولسا ساپالى مەديتسينالىق كومەك الا الماي كەلەدى. نەگىزگى سەبەپتەرىن مينيستر ءوز بايانداماسىندا ايتتى. ونى قايتالاۋدىڭ قاجەتى جوق. سوندىقتان دا بۇگىنگى مينيستر ۇسىنعان مەديتسينالىق كومەك ساپاسىن جاقسارتۋ بويىنشا شارالاردى جالپى قولدايىق. دەنساۋلىق ساقتاۋ مينيسترلىگىنە وڭىرلەرمەن بىرلەسىپ، ۇسىنىلعان شارالاردىڭ ءتيىمدى ىسكە اسىرىلۋىن قامتاماسىز ەتۋدى تاپسىرامىن»، - دەدى ۇكىمەت باسشىسى.
وسى رەتتە پرەمەر-مينيستر كۇنى كەشە پەتروپاۆل قالاسىندا بولىپ، جاڭادان سالىنىپ جاتقان شاعىن اۋداننىڭ قۇرىلىس جۇمىستارىمەن تانىسقانىن اتاپ ءوتتى.
«600 دەي ەسكى ءۇي ءسۇرىلىپ، ورنىنا ۇلكەن شاعىن اۋدان سالىنۋدا، 2 مىڭداي پاتەر دايىن بولادى. سوندا قاراپ وتىرساڭىز، سول ۇيدە تۇراتىن ادامداردىڭ ەمحاناعا تىركەلگەندەر سانى ارتىپ، دارىگەرلەرگە جۇكتەمە ارتادى دەگەن ءسوز. ال سالىنىپ جاتقان ۇيلەردىڭ ءبىرىنشى قاباتىندا، جانىندا شاعىن ەمحانالار جوسپارلانباعان. قازىر بارلىق وبلىس ورتالىعىندا ەلباسىنىڭ تاپسىرماسىمەن «نۇرلى جەر» باعدارلاماسى بويىنشا كوپ ۇيلەر سالىنىپ جاتىر. ولاردىڭ دا ەشبىرىندە شاعىن ەمحانالار جوسپارلانباعان»، - دەگەن باقىتجان ساعىنتايەۆ بۇل ماسەلەنى ورىنباسارى ەربولات دوسايەۆقا شەشۋدى تاپسىردى.
سونىمەن قاتار، ءبىرىنشى ورىنباسارى اسقار مامينگە جاڭا ۇيلەردى جوسپارلانعان كەزدە ءبىرىنشى قاباتتارىندا بالاباقشا مەن شاعىن ەمحانالار بولۋىن قاداعالاۋدى ەسكەرتتى.
«كاسىپكەرلەر ينۆەستيتسيا تارتۋعا نيەتتى، وسى باعىتتا جۇمىس جۇرگىزۋىمىز قاجەت. مۇنان بولەك، دەنساۋلىق ساقتاۋ مينيسترلىگى مەن اقپارات مينيسترلىگى جانە اكىمدىكتەر بىرلەسە وتىرىپ، مەديتسيناداعى رەفورمالار، ادامداردىڭ ساپالى مەديتسينالىق كومەك الۋىن جونگە كەلتىرەتىن جاڭا تەحنولوگيالار تۋرالى حالىق اراسىندا ۇنەمى ءتۇسىندىرۋ جۇمىستارىن جۇرگىزۋى كەرەك. بۇل جۇمىس تولىققاندى جۇرمەي وتىر. وسىعان باسا نازار اۋدارىڭىزدار»، - دەدى ول.
