شەكاراداعى قازاقستاندىقتار وتاندىق تەلەارنالاردى سيفرلىق ساپادا تاماشالايدى
بۇل تۋرالى بۇگىن ۇكىمەتتىڭ سەلەكتورلىق رەجيمدەگى وتىرىسىندا اقپارات جانە كوممۋنيكاتسيالار ءمينيسترى داۋرەن ابايەۆ ايتتى، دەپ حابارلايدى قازاقپارات ءتىلشىسى.
«بيىل قازاق تەليەۆيزياسىنىڭ قۇرىلعانىنا 60 جىلدان اسا ۋاقىت ءوتتى. ءدال وسىنداي تاريحي كەزەڭدە ءبىز وتاندىق سيفرلىق ەفيرلىك تەلەراديوحابارلارىن تاراتۋدى كەشەندى تۇردە قولعا الدىق. قازىر جان-جاقتى جۇمىستار جۇرگىزىپ جاتىرمىز. بۇل اۋقىمدى ءارى ماڭىزدى شارا ەكەنىن اتاپ وتكىم كەلەدى»، - دەپ توقتالدى مينيستر.
وسى رەتتە ول سيفرلىق حابار تاراتۋ قالىڭ كورەرمەنگە اسىرەسە اۋدان، قالا ورتالىقتارىنان شالعايدا ورنالاسقان اۋىلداعى اعايىنعا قانداي پايدا اكەلەتىندىگىن اتاپ ءوتتى.
«بىرىنشىدەن، بۇل ەفيردىڭ جانە دىبىستىڭ جوعارى ساپاسىن، ەكىنشىدەن، تەلەارنالار پاكەتىنىڭ ۇلعايۋىن قامتاماسىز ەتەدى. مەملەكەتىمىز وسى جۇمىستى قولعا العان ۋاقىتتا بۇكىل ەلدىڭ اۋماعىن سيفرلىق دەڭگەيگە كوشىرۋ جوسپارىنىڭ جۇزەگە اساتىنىنا سەنىمسىزدىكپەن قاراعان ادامدار دا بولدى. ويتكەنى قازاقستاننىڭ جەر كولەمى وتە اۋقىمدى ەكەنى بەلگىلى. حالىق تا تىعىز ورنالاسپاعان. شەكاراداعى اۋىلدار مەن الىس ەلدى مەكەندەردە تۇراتىن حالىقتىڭ 100 پايىزىن سيفرلىق حابار تاراتۋعا اۋىستىرۋ الىنبايتىن قامال سياقتى كورىنگەنى راس. الايدا ەلباسىنىڭ تىكەلەي تاپسىرماسى مەن ساياسي ەرىك-جىگەرىنىڭ ناتيجەسىندە قارجىلىق ماسەلەلەر دە شەشىلىپ، تەلەكوممۋنيكاتسيا سالاسىنداعى ينفراقۇرىلىمدى دامىتۋعا داڭعىل جول اشىلدى»، - دەدى داۋرەن ابايەۆ.
ماسەلەن، ءمينيستردىڭ دەرەگىنشە، كورشى قىرعىزستان سيفرلىق حابار تاراتۋعا تولىق اۋىستى. ولارعا 100 دەن اسا راديو تەلەۆيزيالىق ستانسا جەتكىلىكتى بولدى. ال ءبىزدىڭ مەملەكەتتى تولىق قامتاماسىز ەتۋ ءۇشىن 827 ستانسا قاجەت.
«بىز ول جۇمىستى از ۋاقىتتا اياقتاۋدى جوسپارلاپ وتىرمىز. سيفرلىق حابار تاراتۋ تەحنيكالىق ماسەلەنى شەشۋمەن عانا شەكتەلمەيدى. بۇل ەڭ الدىمەن ۇلكەن يدەولوگيالىق شەشىم دەۋگە تولىق نەگىز بار. وزدەرىڭىزدىڭ دە ەستەرىڭىزدە بولار، ءبىز وسى اۋقىمدى جۇمىستى باستاعان ۋاقىتتا شەكارالاس اۋماقتا ورنالاسقان اۋىلداردا وتاندىق ءبىر-ەكى تەلەارنا عانا كورسەتەتىن. ءبىز وسى ستاندارتقا تولىق اۋىسساق قازاقستاندىقتار وبلىس ورتالىقتارى دەڭگەيىندە 30 عا جۋىق تەلەارنانى، اۋىل جانە اۋدان ورتالىقتارىندا 15 كە جۋىق وتاندىق تەلەارنانى سيفرلىق ساپادا تاماشالاي الادى. ياعني وتاندىق ارنالار ارقىلى حالىق وزدەرىنە قاجەتتى اقپارات پەن باعدارلامالارعا قول جەتكىزەدى. وتاندىق پاكەتتە «جاڭالىق» پەن «بالالارعا ارنالعان»، «مادەنيەت» پەن «كينو»، «سپورت» سياقتى ءتۇرلى ارنالار بولادى. بۇل مەملەكەتتىك اقپاراتتىق ساياساتتى نىعايتۋعا دا ءوز ىقپالىن تيگىزەدى»، - دەدى مينيستر.
