استاناداعى بەسىنشى انا ءولىمى: جاس اناعا سيرەك كەزدەسەتىن قاۋىپتى دياگنوز قويىلىپ وتىر

استانا. قازاقپارات - استانالىق دارىگەرلەر ەلورداداعى بەسىنشى انا ولىمىنە قاتىستى تۇسىنىكتەمە بەردى، دەپ حابارلايدى قازاقپارات ءتىلشىسى.

1- قىركۇيەك كۇنى 20:22-دە 2№ كوپبەيىندى قالالىق اۋرۋحانادا انا ءولىمى تىركەلگەن بولاتىن. بۇل - جىل باسىنان بەرى استانادا قايتىس بولعان بەسىنشى انا.

«قايتىس بولعان ايەل قانت ديابەتىمەن اۋىرعان. جۇكتىلىكتىڭ العاشقى كەزەڭىنەن-اق، 7№ ەمحاناعا تىركەلىپ، قابىلداۋعا تۇراقتى بارعان. ءبىراق ول ينسۋليندىك تەراپيادان باس تارتقان جانە دارىگەرلەر قانت دەڭگەيىن تۇسىرەتىن تابلەتكالار جازىپ بەرگەن. ونىڭ ۇستىنە، ايەلدىڭ بويى 165 سانتيمەتر بولا تۇرا، سالماعى 95 كەلىدەن اسقان. الدىڭعى بالالارىن تابيعي جولمەن دۇنيەگە اكەلگەندىكتەن، دارىگەرلەر وعان كەزەكتى رەت ءوز كۇشىمەن بوسانۋعا مۇمكىندىك بەرگەن»، - دەدى 2№ كوپبەيىندى قالالىق اۋرۋحانانىڭ باس دارىگەرى يۆان لي استانا اكىمدىگىندە وتكەن بريفينگتە.

سونىمەن بىرگە، بريفينگتە قايتىس بولعان ايەلگە قويىلعان الدىن-الا دياگنوز حابارلاندى.

«بۇل - اياقاستى بولعان ءولىم. الدىن الا بولجام بويىنشا، قايتىس بولعان ايەلگە «قاعاناق سۋىنىڭ ەمبولياسى» دياگنوزى قويىلدى. 2- قىركۇيەكتە پاتولوگيالىق سويۋ جۇرگىزىلگەندە، بۇل دياگنوز راستالدى. ءبىراق، بۇل ءالى دە الدىن الا بولجام بولىپ قالا بەرەدى، اپتا سوڭىندا پاتالوگواناتومدار گيستولوگيالىق زەرتتەۋدەن كەيىن ناقتى دياگنوزدى جاريالايدى»، - دەدى استانا قوعامدىق دەنساۋلىق ساقتاۋ باسقارماسى باسشىسىنىڭ ورىنباسارى ءاليا رۇستەموۆا.

قازاقستاننىڭ شتاتتان تىس باس اكۋشەر-گينەكولوگى، پروفەسسور يۆان كوركاننىڭ ايتۋىنشا، قاعاناق سۋىنىڭ ەمبولياسى - وتە سيرەك دەرت، 10-15 مىڭ جۇكتى ايەلدىڭ بىرىندە عانا كەزدەسەدى. بۇل جاعدايدا قاعاناق سۇيىقتىعىنىڭ ايەلدىڭ قان اعىسىنا تۇسۋىنەن جۇكتىلىك نەمەسە بوسانۋ اسقىندايدى.

«ونى الدىن الا بولجاۋ الەمدە مۇمكىن ەمەس. مەديتسينالىق كومەك كورسەتىلگەنىمەن، ايەلدەردىڭ %90 كوز جۇمادى. بۇل - الەمدىك ستاتيستيكا. دارىگەرلەر ايەلدى قۇتقارۋ ءۇشىن بارىن جاسايدى، ەشقانداي دارىگەر پاتسيەنتتى جوعالتقىسى كەلمەيدى. دارىگەرلەر ءۇشىن دە، تۋىستارى ءۇشىن دە بۇل - ورنى تولمايتىن ورتاق قايعى»، - دەدى بريفينگتە يۆان كوركان.

باس اكۋشەر-گينەكولوگ بۇل اۋرۋعا ساناۋلى مينۋتتاردىڭ جەتكىلىكتى ەكەنىن ايتتى.

«بوسانۋ الدىندا قاعاناق سۋىندا نارەستەنىڭ تەرى بولىكتەرى، ءزارى مەن ءناجىسى بولادى. وسىنىڭ بارلىعى ايەلدىڭ قان اعىسىنا تۇسۋگە تىرىسادى. مۇندا ساناۋلى مينۋتتاردىڭ ءوزى ماڭىزدى. ءتىپتى دەر كەزىندە مەديتسينالىق كومەك كورسەتىلسە دە، ناتيجەسىز بولۋى مۇمكىن. الەم بويىنشا بۇل دياگنوزدا ايەلدەردىڭ 10 پروتسەنتى قاعاناق سۋى از مولشەردە ەنگەندە عانا امان قالادى»، - دەدى يۆان كوركان.

ايەلدىڭ جۇرەك قىزمەتى توقتاعان ساتتە كەسىر تىلىگى ارقىلى بالانى الۋ تۋرالى شەشىم قابىلدانعان. ازىرگە شاقالاقتىڭ جاعدايى اۋىر، ءبىراق دارىگەرلەر ءسابيدىڭ وڭالىپ كەتۋ مۇمكىندىگى مول ەكەنىن جەتكىزدى.