داۋرەن ابايەۆ وڭىرلەر سيفرلىق حابار تاراتۋعا قاشان كوشەتىنىن جاريا ەتتى

استانا. قازاقپارات - بۇگىن ۇكىمەتتىڭ سەلەكتورلىق رەجىمدەگى وتىرىسىندا اقپارات جانە كوممۋنيكاتسيالار ءمينيسترى داۋرەن ابايەۆ وڭىرلەر قاشان سيفرلىق حابار تاراتۋعا كوشەتىنىن جاريا ەتتى، دەپ حابارلايدى قازاقپارات ءتىلشىسى.

«حالىق كوزدەگىنى عانا ەمەس، كوڭىلدەگىنى دە كورەدى»، - دەگەن ءسوز بار. سوندىقتان سيفرلىق حابار تاراتۋعا كوشۋ حالىقتىڭ يگىلىگى ءۇشىن جاسالادى. تاعى ءبىر ارتىقشىلىق - سيفرلىق حابار تاراتۋعا كوشكەن جاعدايدا راديوجيىلىكتەر دە بوسايدى. وسىلايشا بوساعان جيىلىكتەردى ءبىز بايلانىس سالاسىنداعى جاڭا تەحنولوگيالاردى دامىتۋعا پايدالانۋ مۇمكىندىگىن قاراستىرىپ وتىرمىز. ول ءۇشىن بايلانىس وپەراتورلارىمەن جان-جاقتى جۇمىس جۇرگىزەمىز»، - دەدى مينيستر.

ونىڭ ايتۋىنشا، وتكەن جىلى اقپارات جانە كوممۋنيكاتسيالار مينيسترلىگى «تەلەراديو حابارلارىن تاراتۋ» زاڭىنا وزگەرىستەر ەنگىزدى. وسىلايشا ولاردىڭ ينفراقۇرىلىمدارىنىڭ دايىندىعىنا ساي ايماقتاردى كەزەڭ-كەزەڭىمەن كوشىرۋگە جول اشتى.

«ماڭعىستاۋ، جامبىل مەن تۇركىستان وبلىستارى جانە شىمكەنت قالاسى - 2018-جىلدىڭ اياعىنا دەيىن، الماتى، پاۆلودار، قوستاناي وبلىستارى - 2019-جىلى، شىعىس قازاقستان، سولتۇستىك قازاقستان، قاراعاندى، اتىراۋ، قىزىلوردا وبلىستارى - 2020-جىلعا دەيىن، باتىس قازاقستان، اقمولا، اقتوبە وبلىستارى، استانا جانە الماتى قالالارى - 2021-جىلى كەزەڭ-كەزەڭىمەن جاڭا فورماتقا اۋىسادى»، - دەدى داۋرەن ابايەۆ.