دارىگەرلەر كەلىسىلگەن ەڭبەكاقى الاتىن بولادى - مينيستر
بۇل تۋرالى بۇگىن ۇكىمەتتىڭ سەلەكتورلىق رەجيمدەگى وتىرىسىندا ەلىمىزدىڭ دەنساۋلىق ساقتاۋ ءمينيسترى ەلجان ءبىرتانوۆ ايتتى، دەپ حابارلايدى قازاقپارات ءتىلشىسى.
وتىرىستا العاشقى مەديتسينالىق كومەكتىڭ ساپاسىن جاقسارتۋ شارالارى تۋرالى بايانداعان مينيستر: «العاشقى مەديتسينالىق كومەك ماماندارىنىڭ قۇزىرەتىن ارتتىرۋ بويىنشا بەيىندى دارىگەرلەرگە وكىلەتتىكتەر بەرۋدى ەسكەرە وتىرىپ، العاشقى مەديتسينالىق كومەك ماماندارىنىڭ قىزمەتتەرىن كەڭەيتۋ جانە وتباسىلىق دارىگەرلەردى ديپلومنان كەيىن وقىتۋ جاڭا ستاندارتىن ەنگىزۋ جوسپارلانۋدا. مامانداردى ىنتالاندىرۋ ماقساتىندا 2019-جىلى قىزمەتتەرىنە تاريف سوماسىن كەزەڭ-كەزەڭىمەن ارتتىرا وتىرىپ، جالپى پراكتيكا جانە بەيىندى دارىگەرلەرگە كەلىسىمدى ەڭبەكاقى تولەۋ ەنگىزىلەتىن بولادى»، - دەدى.
ەلجان ءبىرتانوۆتىڭ ايتۋىنشا، بۇل العاشقى مەديتسينالىق كومەك ماماندارىنىڭ جالاقى دەڭگەيىن 20 پايىزعا دەيىنگە ارتتىرۋعا مۇمكىندىك بەرەدى. العاشقى مەديتسينالىق كومەك دارىگەرىنە شاققاندا قارالاتىن پاتسيەنتتەر سانىن 1700 ادامعا دەيىن تومەندەتىپ، مەديتسينالىق مامانداردىڭ جۇكتەمەسىن ازايتۋدى قامتاماسىز ەتەدى.
«مەمەملەكەتتىك الەۋمەتتىك ساقتاندىرۋ قورى اياسىندا بەكىتىلگەن حالىقتىڭ تەك بەلگىلەنگەن مولشەرى شەگىندە عانا العاشقى مەديتسينالىق كومەك ۇيىمدارىن قارجىلاندىرۋ قامتاماسىز ەتىلەتىن بولادى. وسى شارالار اۋرۋلاردىڭ جانە اسقىنعان اۋىرۋلاردىڭ پروفيلاكتيكاسىن جاقسارتۋعا الىپ كەلەدى»، - دەدى ول.
